eSefarad Noticias del Mundo Sefaradi
Partajamos kon los oyentes un programa kon temátika del umor en la tradisión oral sefardí, muy prezente tanto en el patrimonio muzikal como en diversos kuentesikos y dichas.
Prinsipiamos el programa kon la aktualitá de la guerra en Ucrania. En notisias i javeres kulturales sefardíes informamos sovre la inauguración de la atirante ekspozisión en Centro Sefarad-Israel: Rembrandt, un retrato del mundo judío desde Ámsterdam, a la kaveza komo komisaria la historiadora de Arte Alba Carballeida, se podrá vishitar del 26 de Julio al 26 de octubre. Ofresemos varios enshemplos de lisiones eskojidas de muestros archivos, en rolo temátiko de umor kon kuentesikos i dichas i las eksplikasiones de las diversas palavras i sus traduisiones a modo de lisiones para ambezar la lingua a los oyentes.
Konversasión i kuentesikos traverso la radio, ansí los oyentes se ambezan palavras en djudeo-espanyol i konosen su orijin. Entre los kuentesikos i istorias: Djohá, este presonaje umorístiko muy afamado en la tradisión oral sefardí: «Djohá avokato» i «Djohá ande el karnesero» (manaderos: Lisiones Emisión Sefarad. Marie Christine Varol). Los kantes ke mos akompanyan en este programa son de diversitá «Bre Sarika, Bre», interpretado por David Harris (Turquía) y una versión a kapella «Ven Sarika Ven», la versión muzikal «Ven kerida, ven amada» interpretada por Sandra Bessis. Kurunamos el programa umorístiko kon el ermozo kante «Esta muntanya d’enfrente» en la boz de la kantadera sefardí Esther Ackermann.
DOMINGOS A LAS 22.30 HORAS, MARTES A LAS 18.30 HORAS UTC.
La «Emisión Sefarad» es un programa kultural de radio, en lingua sefardí o djudeo-espanyol, que se siente kada lunes enverso Oriente Medio i Mediterráneo i los martes enverso América Norte i Sur. Sefarad es uno de los nomvres de Espanya, i el sefardí es una lingua de baza medieval a la ke se adjuntan palavras de los dialektos i linguas de las sivdades onde los sefaradim moravan. Rajel Barnatán, apareja i prezenta las emisiones i sus kontenido por entero: entrevistas, presonajes, folklor i múzika de ancha diversidad, aktividades, tradisiones, literaturas i una lingüístika atada a la kultura ke tyene sus raízes en Espanya. Ansí «Emisión Sefarad» guadra el trezoro poétiko de los S X al XII en uno de los grandes patrimonios kulturales entregados a la umanidad. Ansiemzmo la kreasión kontemporánea arrebive en muestros días i atira el intereso de oyentes de diversos lugares i paízes.
