eSefarad Noticias del Mundo Sefaradi
Ofresemos un programa sovre la importansia de konservar, ensenyar i ambezar la lingua sefardí. Los diferentes manaderos son inspirasión, para poder konservar i kontinuar meldando muestra lingua, pero es de destakar ke la importansia es ensenyar, avlar i konversar en muestra lingua. Es kon este buto ke ofresemos dichas, modos de avlar, frases de uso en la lingua sefardí ansí komo kuentos i istorias, komo la eskola del oyente Emisión Sefarad. En este kapitoló Paloma Díaz-Mas, Catedrática de la Rae, Licenciada en Filología Románica y Periodismo, ke es una gran espesialista en la lingua, literaturas i istoria sefardí, mos ofrese konseshos para konservar la lingua en sus distintos metods. Autora de tekstos komo «Breve Historia de los Judíos de España» o su afamado livro «Poesía Oral Sefardí» siempre mos trasmente su saver i sus konosensias sovre la temátika del avenir de la lingua. Kreyemos ke la importansia es kontinuar avlando i meldando en muestra lingua i ensenyar. Ansimezmo kontinuamos ofresiendo testimonio del Profesor Jorge Úbeda (Profesor de Filosofía de la Universidad Complutense de Madrid)sovre la figura de Spinoza en la tradisión sefardí i komo a bezes esta tradisión se topó okulta. Kantes tradisionales i romanses ke mos akompanyan: «La Novia del Conde de Alba», «Buena semana». Kurunamos el programa kon el ermozo kante tradisional d’amor «La serena» en la interpretasión de Esther Ackermann. El avenir de la lingua es avlar, sintir, konservar, meldar i ambezar, i asta tener esfuenyos en muestra lingua.
________________________________________________
DOMINGOS A LAS 22.30 HORAS, MARTES A LAS 18.30 HORAS UTC.
La «Emisión Sefarad» es un programa kultural de radio, en lingua sefardí o djudeo-espanyol, que se siente kada lunes enverso Oriente Medio i Mediterráneo i los martes enverso América Norte i Sur. Sefarad es uno de los nomvres de Espanya, i el sefardí es una lingua de baza medieval a la ke se adjuntan palavras de los dialektos i linguas de las sivdades onde los sefaradim moravan. Rajel Barnatán, apareja i prezenta las emisiones i sus kontenido por entero: entrevistas, presonajes, folklor i múzika de ancha diversidad, aktividades, tradisiones, literaturas i una lingüístika atada a la kultura ke tyene sus raízes en Espanya. Ansí «Emisión Sefarad» guadra el trezoro poétiko de los S X al XII en uno de los grandes patrimonios kulturales entregados a la umanidad. Ansiemzmo la kreasión kontemporánea arrebive en muestros días i atira el intereso de oyentes de diversos lugares i paízes.
