eSefarad Noticias del Mundo Sefaradi
Los romanses espanyoles son guadrados i konservados por los sefardim ke los yevan kon sí komo ese trezoro muzikal ke los akompanya en los kaminos a sus muevas komunidades en los paízes onde van a morar dempués de la ekspulsión de Sefarad en 1492, Ansí la tradisión pasa de djenerasión en djenerasión guadrando esta rikeza ke es patrimonio universal, son los sefardim ke konservan estos romanses en sus distintas versiones, ma se empezaron a kantar soltanto a kapella es dizir solo kon la boz, ese es el legado ke aínda konservamos i difuzamos, munchos de estos romanses toman la temátika de la musher, por enshemplo eskojimos sentir este romanse a kapella «La galana y el mar» i kontinuamos kon unotro romanse a kapella «La vuelta del marido» ofresido en la boz de una musher sefardí. Para kontinuar este programa las literaturas de tradisión oral son unotro espasio de la memoria sefardí, kompartimos el kuento «La Fotografía» ke reflekta la importansia de una fotó en una istoria de una famyia sefardí traverso el tiempo, kontado por una musher de esta famyiaí: Roz Kohen. En muestro patrimonio muzikal destaka el romansero i las kantikas, de temátika diferente i munchos bazados en temátika istórika i amorosa. Kurunamos el programa kon un afamado romanse «Gerineldo» en la versión de la kantadera Judy Frankel.
________________________________________________
Muevos orarios emisión: Domingos 09’30, Lunes 12’05, Lunes 22 hs. (Onda corta), España
La «Emisión Sefarad» es un programa kultural de radio, en lingua sefardí o djudeo-espanyol, que se siente kada lunes enverso Oriente Medio i Mediterráneo i los martes enverso América Norte i Sur. Sefarad es uno de los nomvres de Espanya, i el sefardí es una lingua de baza medieval a la ke se adjuntan palavras de los dialektos i linguas de las sivdades onde los sefaradim moravan. Rajel Barnatán, apareja i prezenta las emisiones i sus kontenido por entero: entrevistas, presonajes, folklor i múzika de ancha diversidad, aktividades, tradisiones, literaturas i una lingüístika atada a la kultura ke tyene sus raízes en Espanya. Ansí «Emisión Sefarad» guadra el trezoro poétiko de los S X al XII en uno de los grandes patrimonios kulturales entregados a la umanidad. Ansiemzmo la kreasión kontemporánea arrebive en muestros días i atira el intereso de oyentes de diversos lugares i paízes.
