eSefarad Noticias del Mundo Sefaradi
Los kantes d’amor tradisionales i kontemporáneos en el Patrimonio Musical Sefardí. Prinsipiamos el programa kon un viashe traverso distintos kantes ke amostran la varietá en la temátika amorosa del patrimonio sefardí. Los kantes d’amor i de bodas son de una rikeza destakada dientro de los temas de kantes tradisionales, ma tambyén en el día d’oy se pujan kreasiones poétikas en kantes i poemas ke mos yevan a esta temátika, es ansí ke partajamos los kantes tradisionales «Auvrixme galanika» onde el Novio kere konvenser de ver a la Novia i ke avra su ventana sin ser vistos por los padres de eyia, kontinuamos viashe muzikal kon el kante de un pásharo de linda figura «Pásharo de ermozura» en la versión de Janet & Jak Esim (Turquía). Rosa Zaragoza i su versión del kante «Por la tu puerta yo pasí», ke mos yeva a los «Arvolikos d’almendra» unotro kante tradisional interpretado por el Trío Sefarad. En los kantes de kreasión kontemporánea vos azemos musafires para sintir «Kuando te topí» un kante d’amor de Beatríz Mazliah en la boz de Mónica Monasterio. Un viashe ke eskapa kon Joaquín Díaz i esta ermoza «Cantica de Bodas». Las versiones de kantes d’amor son guadradas kon mimo en el Patrimonio Muzikal Istóriko Sefardí, onde romanses i kantikas se akunan en un mezmo korasón.
________________________________________________
DOMINGOS A LAS 22.30 HORAS, MARTES A LAS 18.30 HORAS UTC.
La «Emisión Sefarad» es un programa kultural de radio, en lingua sefardí o djudeo-espanyol, que se siente kada lunes enverso Oriente Medio i Mediterráneo i los martes enverso América Norte i Sur. Sefarad es uno de los nomvres de Espanya, i el sefardí es una lingua de baza medieval a la ke se adjuntan palavras de los dialektos i linguas de las sivdades onde los sefaradim moravan. Rajel Barnatán, apareja i prezenta las emisiones i sus kontenido por entero: entrevistas, presonajes, folklor i múzika de ancha diversidad, aktividades, tradisiones, literaturas i una lingüístika atada a la kultura ke tyene sus raízes en Espanya. Ansí «Emisión Sefarad» guadra el trezoro poétiko de los S X al XII en uno de los grandes patrimonios kulturales entregados a la umanidad. Ansiemzmo la kreasión kontemporánea arrebive en muestros días i atira el intereso de oyentes de diversos lugares i paízes.
