eSefarad Noticias del Mundo Sefaradi
Pesah ya se esta aserkando kon pasos grandes.
En nada de dos semanas ya lo tenemos aki para fiestarlo kon alegria.
Segun muestra tradision, oganyo pasa un evento «super-istoriko»:
El kalendario Judyo dize, ke kada 28 anyos, en el mez de Nisan (i siempre en dia de mierkoles), el sol torna i yega al punto egzakto el ke estava en el momento de la kreasion.
– I porke ekskluzivamente en dia de mierkoles?
– Porke, a lo ke eskrive en Bereshit (1, 14-19), el sol i la luna fueron kreados i «kolgados» en los sielos djustamente en el kuarten dia de la kreasion…
Muestros hahamim mos rekomendan de salir a la madrugada de tal dia (kada 28 anyos), mirar al sol, i dizir la «Bendision del Sol» («Birkat aHama», en ebreo).
Si trato de traduizir esta bendision a muestra lingua, sera:
«Bendicho Tu Adonay, rey de el mundo, AZIEN ECHO de PRINSIPIO» (ke en ebreo es:»ose maase bereshit»).
Este fenomeno -al menos segun la tradision djudiya- toma lugar OGANYO en el 8 de Avril, ke es dia de mierkoles, noche de Pesah, (naturalmente DE MANYANIKA).
Muestros savios dizen, indemas, ke este fenomeno okurio presizamente en noche de Pesah (vispera de Pesah), solo 12 vezes en los 5769 anyos de alkavo.
¡Entonses, oganyo es de verdad un anyo espesial!
Keridos amigos i amigas, ¿no vash a salir (al menos una vez a los 28 anyos) a ver el espaktakolo maravyozo del sol en su punto de amaneser?
Yehuda Hatsvi
2009
