eSefarad Noticias del Mundo Sefaradi
Keridos amigos i amigas
Oy me torne en el Jewish News a la «Sichat Yosef» ke avla del mez de TEVET ke empeza en los ultimos dias de Hanuka. En la tradision Judia TEVET es un mez preto i malo..El medio del invierno en la Hemisphera del Norte.El 10 Tevet marka el empesijo de la konkista por el Rey Nebuhadnezzar ke termino kon la destruksion del Primer Templo i kon el Exilio en Babilonia.
Saludes a todos
EL MEZ DE TEVET EN EL KALENDARIO
Ma si se mira a la referensia biblika el nombre Tevet no aparese. Se avla de los evenementos del mez 10. Era en el anio 9 de su reinado en el mez 10 i dia 10 ke Nebuhadnezzar Rey de Babilonia vino, i fue invitado,a Jerusalem.La sivdad kaio basho.[Melachim II,25.I-2].De misma manera kuando se trata de los 4 dias de Tanid assosiados kon la Destruksion del Templo, seran en el futuro «Dias a Selebrar».[Zechariah 8:19].El Dio disho a los ke los invitaron, ke el Tanid del mez 4,5,7 i 10 seran por La Kasa De Judah para alegrarse i ser orozo.
Ande es ke se melda el nombre TEVET? Por esto tenemos ke saltar 3 mezes al Festival de Purim ke se assosia kon Hanuka. En la Megillah de Esther se melda «Esther fue yevada al Rey Ahashverosh,a su palasio en el mez 10 ke es el mez de Tevet. En el anio 7 de su reinado. Fue Tevet ke vido los evenementos terminando en el Primer Exilio. La istoria de Purim se paso en el exilio ande la Persia harvo a Babilonia.[La primera gerra entre Iran i Irak] i se vido ayi en el mismo mez nuestra redempsion.
Mismo en medio de la eskuridad del exilio i el desespero del invierno, la luz de la Kontinuasion Judia brillia i penetra la Konsiensia Judia. Despues de Tevet en la Era Post-Babiloniana,la Megillah de Esther avla de otros mezes. Nisan, Sivan i Adar. Se refera a eyos en numeros i los nombres a kualos se refera vienen del Exilio.Kislev i Nisan aparesen tambien en el livro de Nehemiah. Aki se poza la kestion ke savemos ke el kalendario lunar era la Primera Mitsvah dada a Israel komo una nasion.[Shemot 12 i Rashi,Bereshit 1:1]. El uso de este kalendario asegura a nuestras vidas a distinguir todo lo ke se pasa alrededor.
Porke tomimos los nombres utilizados en exilio en lugar de utilizar los numeros komo eran en la biblia? Ramban [Shemot 12:2] ke es konsistente kon la Profesia de Jeremiah dise «Van a venir los dias dise el Dio ke no va ser mas «Komo bive el Dio, ke trusho a los ijos de Israel de la Tierra de Ejipto «Sera mas komo bive el Dio ke los trusho del Norte de Babilonia.»[Jeremiah 16:14-15]
En su forma orijinal numérika empeza kon Nisan i kuando uno mensionava el numero del mez, se akodrava uno del Exodo de Ejipto. El mez 6 era numero 6. En saliendo de Babilonia empezimos a utilizar nombres ke utilizabamos ayi. Esto keria desir ke el Dio nos salvo de Babilonia i ke nos salvara de nuevo en el futuro.
——————————————
Trezladado por Shimon Geron. Sydney
Fuente: Ladinokomunita
