El kal (killa) de mi chikes por Nissim Ashkenazi

El penserio sovre el kal en mi chikes, me traye sentimento de klaridad, ermozura, santidad, respekto, i honor de uno al otro.

Mi padre d.b.m suvio a Israel al anyo 1932 de Salonik para enreziar el porto de Haifa. Era el Rav i Hazan de los Selaniklis, i el fondador (kon otros) del kal, Shevet Ahim Selonikaim. Siempre estava akupado en las orasiones, los kazamientos, espozorios, bar -mitsvot, fiestas, i invitasiones de la komunidad. aparte ke lavoro kon todos de la taifa en el porto de Haifa. fondo el koren de los mansevos, i muchas aktivedades de Halbashat Yetomim, ensenyar la Bibilia, las orasiones i los kostumbres.

Grande honor era de entrar al kal kon mi padre , todos se alevantavan i lo honoravan. komo kriyatura me plazio el aire i la unidad en el kal.

A la entrada se avren los ojos de las luses kon los nombres de miembros ke ya no estan en este mundo. Los tablos de memoria kon lusizikas en forma de parmachetes, kon nombres de los Niftarim. 

La ermozura de la teva, la Parohet, el aron hakodesh kon la tabela de laja de los diez mandamientos, eskritos en letras de kidush levana. Los livros de la Tora, embrujados kon seda brodeada i los rimonim maneandosen kon sonisikos delisiozos. Las velas blankas de la Azarat Nashim, i los kultukitos de kolores en las siyas.

Las mujeres eskondidas kon rizas en las manos, espesialmente en la orasion de shabat. Los ombres bien vistidos, kon chapeos i jaketas, i kundurias brilyantes, kon kutikos redondos de tutun para sarnudar…, el shamash kon la pompika de kolonia, ke salpikava a  todos, golor buena, aire bueno, todos se konosen i todo kon amista.

Los kantes de las orasiones i mi padre kon una boz yena de sentimiento i piyada, en kantando la parasha de Akedat Itshak, las saltavan las lagrimas a las mujeres, i las rizas ya estavan prontas…

El kitar del Sefer Tora, eran momentos de entuziasmo i todos kon tsitsit en la mano, bezando el Livro Santo kon ardor, de tradision, de muchos anyos, ardor de las rasinas i los kostumbres.

Los ke suven a la Tora, estan akompanyados kon kantes, estimasion i honor, ‘yaale ve yavo’. El gabai, kon la kashika de letras i numeros para akodrar las donationes, nombre i sumo, kon una lastikita.

Aviya mucho umor en la komunidad, solo de los nombres, te salta la riza. «David limon, el araviozo, «Yuda oreja, el ke le modriyeron la oreja en un pleito…  «Liachi varandado, el ke tiene la kama al koridor, Mushiko haspis, – el flakito, «Muiz el sodro -el ke no siente bueno desde su chikes, o Sulema la harova- eskarso, i mas.

Las mujeres teniyan nombres komo, «Esterina la bashika, Dudun la altereada, Deizi la mis -era halis ermosa, Binuta la savioza, i Rashelika la simpatika.

Shabat la mediodiya, veniyamos los chikos, para meldar Tehilim, el tio Yosef Shevah no deshava dingun yerro, otra ves , otra ves, asta ke lo meldamos sin yerros. I me akodro la Avdala, en saliendo de Shabat, i el Bore mine besamim teniyamos kutis burakados kon azas (mango) i adyentro los perfumes ke faziyan golor i sunido 

Los moadimes i las fiestas, kon los bonbones ke echan las mujeres enriva de los novios de kazamientos o novios de bar mitsvot.

Este tiempo era el mijor de mi vida. Malorozamente era kurto, en la gerra de independensia, kayo mi padre, i yo a la edad de diez anyos ya era guerfano, i el aire fue trokado enteramente.

Kon amista a todos