eSefarad Noticias del Mundo Sefaradi
Durante el konflikto entre Israel i el Iran el merkado mundial del petrol no fue del todo influensado sovre la novela ke el Estrecho de Hormuz sea blokado en no deshando por el Iran de pasar a las naves. Entre 19 a 21 milyon de variles de petrol i sus derivativos pasan kada diya por este lugar onde la partida la mas estrecho es entre 36/40 kilometros, kontrolado por el Iran i el Oman. Dunke punto importante de un trafiko de naves internasyonalas.
Durante el konflikto los presyos del petrol fueron relativamente kalmos i no trespasaron mas de $ 77 el varil, koza ke fue de kurta perioda i el presyo torno a $ 68 el varil unos kuantos diyas mas tadre. No olvidar ke las grandes bankas komo J.P. Morgan o Goldman Sachs pretendieron ke en kavzo de serradura del Hormuz el presyo del varil va pujar fina $ 120 para despues a abashar a $ 70 verso la fin de 2025. Este mizmo senario antes 3 anyos izo pensar ke el presyo del varil suvira fina $ 250. Koza ke nunka afito.
Las razónes por las kualas el presyo no suve tanto son las sigientes: 1- la produksyon demazyada de petrol en el mundo; 2- la egzistensya de produktores alternativos al Iran i la pujita de los remedyos infrastruktuales a traverso los payizes, los oleodukos; 3- el rolo de la China ke merka su petrol en grandes kantidades del Iran.
Oy en diya es una realita ke egziste una bastante grande konkerensya entre los produktores de petrol los kualos miran siempre de vender mas, en abashando los presyos a niveles bashos los kualos son establisidos sovre el prensipyo ekonomiko de demanda i de disponibilidad. Mas grande es la disponibilidad ke ariva a un embutido, mas bashos son los presyos. Esto se ve en el Medyo Oriente onde los konfliktos en esta rejyon no se eskapan ma ke no impiden a ke el presyo del varil suva. Ademas los produktores ke no son miembros del OPEC tal la Rusia ke mira de eksportar en grande kuantitad su petrol a la Evropa Unida i a la China, la kayida en la konsomasyon de los produktos fosil ke son remplasados por el nuklearyo o el peham en la fabrikasyon de la elektrisita i no olvidar los otomobiles elektrikos en pujita en el mundo i mas son faktores ke el presyo del varil no pujara fasilmente. Si ajustamos a esto ke Trump mira de vender kon ensistensya su petrol fosil a los Evropeos los manaderos ekonomikos pretenden ke verso la fin de 2025 el varil del brent será debasho de $ 60 i esto kontinuara a lo menos 5 anyos. Malgrado todo puede aver surprizas ke pujaran el presyo, ma esto será pasajero.
El sigundo faktor mayor ke kalma los merkados son los produktores alternativos a los del Medyo Oriente tal el Venezuela i los Estados Unidos ke en kavzo de un blokus del Estrecho de Hormuz pueden empleyar sus stokes de rezerva. Los Estados Unidos dyeron la garansiya ke puederan en kavzo nesesaryo de meter a la dispozisyon del mundo sus reservas stratejikas de petrol ke kontienen 400 milyones de variles i ansi mantener los presyos a los niveles de pas. De otra parte la Arabiya Seudita i los Emirates tienen oleodukos entre el este i el oveste verso la mar Kolorada en la península arabika i entre Los Emirates i Fujairah, ke se emplearan en kavzo de demenester. Los Kurdes i los Irakis puederan empleyar el oleoduk turko de Ceyhan malgrado los konfliktos ke egzisten. Ademas muevos proyektos de oleodukos están en vista entre el Irak la Sirya i la Turkiya.
El treser faktor es la China ke resive el 45 % de su petrol a traverso el Estrecho de Hormuz. El Iran vende serka del 90% de su produksyon de petrol anual a la China, ansi si el lo serra, esto no será solo malo para la China ma para el mizmo. Si el Iran ensiste a blokarlo la China akel tiempo se tornara verso la Arabia Seudita o los Emirates para remplasarlo. No olvidar ke la Rusia será kontenta de una tala serradura ke ovligara la China a merkar su petrolyo en abondansa. La China puedera en mizmo tiempo merkar de los payizes afrikanos i del Venezuela.
Si Israel eskapa kon Gazza i mira de ser rekonosido por la Arabia Seudita, kon la partisipasyon de este payis de la Jordaniya i de Los Emirates puede instalar oleodukos ke servirán a trayer el olyo direktamente al Mediterraneo sin pasar por los estrechos de Hormuz, de Bab al Mandeb i del Kanal de Suez.
En todo kavzo kual ke seya la situasyon en el Medyo Oriente el petrol no es mas una arma para los produktores arabos i muzulmanos de la rejyon komo fue el kavzo en los anyos 1970/80.
Dr. Selim Salti
