EL ESPIRITO DE UNIDAD trezladado al ladino por Simon Geron

En el Jewish News del 9 de agosto avía el artikolo del Profesor Michael Laitman ke se okupa de la Kabala, kon unos sentros a través el mundo. Resivo sus programes en ingles i en ebreo desde anyos. Lo vide mizmo en la televizion en Israel.

Esto es lo ke dize.

Las 3 semanas de «Ben Ha Metsarim»se terminan kon»Tisha B’Av» i markan un tiempo muy eskuro en muestro pasado. El Talmud [Gittin 55/6] konta la istoria de»Kamtsa i Bar Kapitsa» ke simboliza el odio kontra muestro deklino moral i sosial.

Komo se oye i se ve kada dia, ay konfliktos, manipulasiones i mal onestia kontinuando entre mozotros. El tiempo ya vino para ser re-konektados por el amor. El Mundo Oksidental de oy ofrese a los Judios Libertad de parola i de movimiento.Devemos utilizarla para re-estableser la ermandad, el amor i re-konstruir a muestro puevlo. Devemos salir del odio i realizar muestra vokasión para ser una nasión unida i el rol-modal. Ser una nasión ke todos la van a kopiar.

Pensando a las ruinas del Templo mos kaye konsiderar el futuro. Kuando el Zohar avla del Treser Templo, avla de las koneksiones, komo la reparasion de muestros korasones ke están rotos i ke sufren del odio. El Zohar mos explica komo el Mundo Entero puede ser konektado al ver el Puevlo de Israel Unido. Ansi la konstruksión del Templo se aze al dentro de mozotros i entre mozotros. Se reparan los korasones rotos i se kambia el odio kon el amor. El Rey Shelomo disho «El amor kuvre a todos los krímenes». De la misma manera ke se traye una fuersa negativa en siendo separados unos de los otros,se puede traer la fuersa positiva en siendo konektados unos kon los otros.

El sospecho se transmite al karinyo i la izolasión a una responsabilidad mutua. Lo ke es bueno en esto es ke se puede mantener la individualidad en kontribuyendo a la sosiedad i arekojiendo unos benefisios de la kontribusión de otros.

Es regretable ke oy el Mundo Judio sea fragmentado i frakturado, ma tenemos un «GENE» de unidad adientro de mozotros ke se puede rebivir si lo dezeamos. Malgrado las fuersas del EGO vamos a luchar para realizar el buto en komún omo una Nasión Judia. Krear umanidad kon el enshemplo de la unidad en un tiempo ke ay menester de esto. Devemos ser pro-aktivos porke el Mundo esta al punto de kayer. Esto tiene ke azer kon el EGO. Mozotros lo dizimos: «Ama a tu vezino komo te amas a ti». Es un mesaje bien pozitivo i es la sola koza ke mos garantiza muestra seguridad i alegría en Israel i en la Diáspora.