eSefarad Noticias del Mundo Sefaradi
El grupo de la Federasyon Sefaradi de Wst Palm Beah (Florida) tuvo los dos
primeros enkontros de este muevo anyo.
El primo fue de «Echar Lashon», estriktamente en ladino ande despues de bever
el kave kantimos algunos kantes en ladino, enseguito de muestra siempre kerida
Daysi Newell ke mos konto de sus memoryas, de komo se asiya el shabat en su
chikez en la sivdad de Mueva York.
Mas despues tuvimos una charla por modo de komo ayegaron los djudios a Sefarad, kon mucha partisipasion de los ke vamos a estos tan ermozos enkontros.
Ayer tuvimos «Vijita de Aljad», en esta topadura, vienen sefaradim i ashkenazim i se aze en ingles.
Tuvimos la presentasion de un enteresante filmo de la famiya Ruhmani i la estorya
de los djudios de la Libya, ande malorosamente una komunidad de kaji dos mil anyos se desparesyo. Los djudios de la Libya i sus desendensya moran oy diya en Israel i en la Amerika.
Komo siempre despues tuvimos la merenda de Alhad, en ke tenemos la okasyon de
konosermos i avlar unos kon otros i de aresivir a los «snow birds» (pasharikos de inyeve) ke abajan a la Florida fuyendo de las yelores del Norte.
Saluosos i buenos ke estesh.
Elias Barokas
Miami
Para LadinoKomunita
