De la pluma de Sharope: KALE OLVIDAR por Sharope blanco

Ver todos los artículos de esta sección >>

Ma no se puede olvidar
Se puede solo auzar….

YORI, me disheron de riyirme
AVLI, me disheron de kayarme
ME KAYI, asperaron repuesta
RIYI, me gritaron ke nada me importa
«AMA !» me disheron, ama a todos…
AMI, ma salyo ke aman solo los tontos
ROMPYERON MI KORASON
I me demandaron «Perdon !»
PERDONI, de muevo me rompyeron…

PORTANTO
A mi sola palavra, tornaron la espalda !
«ANSINA ES LA VIDA, te vas a auzar
Te vas a yerrar, tendras pena i te vas a ambezar»
Ma no me desharon avlar
Fueron eyos ke avlaron sin kedar
No me desharon del todo ezbafar
Lo ke me duele tanto no lo puide kitar
Avlaron, ma no me sintyeron, no me oyeron
No les importo mi dolor, mis ojos ke yoraron

Oy, mizmo si me dizen de avlar, no vo avlar
Es tadre, las puertas, las ventanas se van a serrar
No estan mas los biervos, las frazas para eksplikar
Lo ke teniya se izo un bulto en mi garon
Kije englutirlo ma kedo aya
YO SERRI LA BOKA,
NO DISHE NADA
MI SILENSYO GRITO,
I YO BOLTI LA KARA.

Sharope Blanco
Estambol

SEFARADIMUESTRO