eSefarad Noticias del Mundo Sefaradi
Ver todos los artículos de esta sección >>
SHABAT SHALOM !
Buen diya a mis Amigos i amigitas keridas
Yom Shishi/Viernes i aparejamos el Shabat kon alegriya i kantos en el korason.
Mis panizikos se estan aunflando ensima del radiator. Los viejizikos ke moran en este apartamento tienen siempre friyo i siempre se keshan ke no estamos kayintando bastante los radyatores… Ya me enfasyi tantos anyos de azer todo lo ke keren ma no keren trokar de administradora ! Les plaze kesharse de todo, solamente para vinir vijitarme, gostar lo ke les ofro, ganar una bolsika yenna de sorizas i palavras dulses, un abraso, una chokolatika kon likor aryento i ezbafar de todo ! A la buena hora ke vengan ma mi chikichiki (ke es mi PC…Ya lo savesh !) kere leche i su supika i agora me beve tambien esprimido de frutas ! Se tresale ! Kale ver sus manikas yamandome kuando me ve pasando allado…. No es posivle de no kererlo bien i aregalarlo kon unos kuantos biervos ke eskrivo aki i aya. Otros unas kuantas semanas va tener 13 anyos…. Su bar mitsva ! Komo el tiempo paso presto ! Me akodro de su primer grito ! Vinitesh todos kon regalos i buenos augures, sorizas i palavras kayntes i me aregalatesh kon muncha afeksyon… Sosh mis ermanikos, mis amigos i amigas i rogo para ke el Di-o no mos esparta i mos de buena salud a todos, keyf de vida i todo bueno AMEN.
Unas kuantas horas mos mankan aki para asyender mis kandelikas alegres de Shabat.
Kijyera saver los kantos de Shabat, no konosko ni una! No es ke vo kantar! El dulse de boz ke tengo en avlando es una dezgrasya kuando kanto… Dunke nunka kanto! Ma kijyera saver de toda manera… Esta noche le vo dizir a Izak Machoro Z»l de kantarme el Kidush ! Le vo aparejar una meza de fiesta! Para el i yo ! No, no konto flortar kon el…
Vos vo dizir Shabat Shalom a todos! Ma antes kero eskrivir aki unas palavras ke estan eskritas en el kalendaryo judyo de esta semana. Dize ansina :
LA AMISTAD ES SIEMPRE UNA DULSE RESPONSABILITAD I NUNKA UNA OPORTUNITAD…
Ke justo… Me konviene tanto ! Diya i diya ringrasyo el Abastado por mis amistades ke no tienen frontyeras i son anchas komo el sielo…
Sestos de abrasos para ken kere aki !
SEFARADIMUESTRO
Estambol
