eSefarad Noticias del Mundo Sefaradi
Ver todos los artículos de esta sección >>
HATAY
Hatay, ande las sivilizasyones se abrasan, se topa al sud, a la frontyera de Turkiya kon Syria. Es una provinsya kon miles de anyos de historya i kon una populasyon de serka de 2.000 000 oy en diya por sus 5.400 km kuadrados de superfisiya… Es la puerta de Turkiya ke se avre al Medyo Oriente i al mundo entero kon sus bodres al Mediterraneo. ANTAKYA (Antiochus en la antikitad) es la kapital administrava i kosmopolita de HATAY i el puerto ISKENDERUN (Alexandretta en la antikitad) en el Golfo de Iskenderun, es la mas grande sivdad. Fue fundada por Alexandro el Grande dospues de su viktorya de la guerra ke izo kon Darius.
Antakya se topa en los bodres del ORONTES o el rio ASI ke nase en el Libano, traversa la Syria i termina su viaje en Turkiya en echandose al Mediterraneo.
Un lugar muy interesante de ver es por seguro el Muzeo de Archeologia kon sus massivas kolleksyones de mozaikas Romanas i Byzantinas. Se pueden ver tambien ovras de la era Paleolithika.
HATAY es rekonosida por la diversitad de su puevlo kon Kristyanos Ermenis, Ortodokses, Katolikos, Mormones, Judyos i Turkos i Arabos por seguro. Kada uno sigue su relijyon en sus iglesyas, sinagogas i mezkitas sin dinguna restriksyon, kon muncha amistad i buena voluntad de todas las partes. Es un trezero de historya milinerya i un importante sentro de sivilizasyon.
La Iglesya/kueva ST.PIERRE es in sityo de pelegrimaje is es kavakada en un roka. Tiene 13 m. de profundura, 9 m. de anchura i 7 metros de altura. Uno de los primeros lugares de enkuentros sekretos de los kristyanos. Es en esta kueva ke se nombraron por la primera vez «kristyanos». Komo en lo mas de las kuevas, de ariva sarpika una agua ke se utilizava para el baptemo. Oy en diya el puevlo de los entornos trata de arekojer esta agua ke aminguo muncho kon el tiempo, para darla a sus hazinos, konvensidos ke es agua santa…. Es uno de los tres sentros santos de los kristyanos kon el Vatikano i Yerushalayim.
HATAY es un sentro famozo de gastronomiya tambien. Muncha gente del payis i del etranjero vienen a gostar sus sukulentos platos de loskualos nunka van a olvidar la savor. Se uzan solo produktos lokales naturales i se kontaron 600 tipos de komidas i dulses i 170 platos por el dezayuno solo… No me sorprende muncho ke el turizmo gastronomiko se developo tanto durante los d’alkavos diez anyos…
La primera koza ke viene al tino kuando se vijita esta provinsya es ke la persona se topa en un paradizo ! Las montanyas AMANOS i la fertila vale de Amik, la vejetasyon, las flores i las vistas maraviyozas son un enkanto para los ojos… Sovre todo si se trata de las kaskadas de Harbiye…. I vos kontare lo ke oyi…
Harbiye ke esta situado a 7 km del sentro de ANTAKYA, la antigua Antiochus tan konosida por su pasado historiko. La ermozura del vedre delantre de los ojos es inkreyivle. Ay munchas kaskadas (kataraktas) unas mas chikas otras altas de vedra…. Restaurantes, guertas ande se beve te, kafe i bevyentas arefreskantes arrebiven el lugar. No se paga para entrar al sityo de las kaskadas. Se ven tiendas del lavoro artizanal ke los turistos merkan komo regalos a sus konosidos o suvenires de sus vijita a este lugar enkantador.
Harbiye es la antigua sivdad de DAPHNE. Un tiempo era nombrada por sus palasyos, sus templos i sus sityos de divertimiento… Terremotos muy fuertes la derrokaron enteramente. Agora es una valle onda ke kalma i da repozo al alma kon las aguas ke koryen de las kaskadas, sus altos platanos sentenaryos i sus arvoles de Laurel.
El Laurel se vende kuaji en todas las tiendas del derredor. Es su shavon ke es lo mas famozo. El Laurel tiene una leyenda antigua ke vo kompartir kon vozotros.
El ijo de Zeus, Apollon, enkuentra un diya en los sielos el dio del amor, EROS, i se burla de su talento de tirador de fleshas, el mizmo siendo un renomado tirador de arkas. EROS se inyerva muy muncho i jura ke un diya le va dar a gostar a Apllon la savor de sus fleshas ! Prepara dos fleshas. El ke arresive la primera flesha va sintir al mizmo instante una passion i un amor loko ke nunka amahara. La segunda flesha tiene la maldisyon de alleshar la persona para siempre del amor …
Un diya, en un boske, alora ke Apollo estava trankilamento jugando su lira ve supito delantre de sus ojos la ermoza de las ermozas, Daphne, la fada (fee, peri) de las aguas. EROS pensa ke es el momento de vengarse de Apollon…. Trava su arka i la flesha entra direktamente al korason de Apollon. Este se siente supito dezesperamente enamorado de Daphne, la ija del dio del rio, alora ke, tan pekado, la flesha del odyo alkansa al korason de Daphne. Lo ke afita es ke Daphne siempre se va fuyir de Apollon i rechesera su amor. El dio de la Luz i de la Muzika, el poderozo i ermozo Apollon, se va kada diya al boske para kontemplar la ermozura de Daphne. Esta se fuye kon espanto a kada vez… Un diya no le keda mas fuersas para alesharse i implora su madre, la diosa de la tierra i su padre, el dio del rio de ayudarla…. Justo al momento ke Apollon estava para apanyarla, el puerpo de la manseva empesa supito a ser de mas en mas pezgado, sus pies soltan raises a la tierra, sus brasos se transforman en ramas i sus kaveyos en ojas!
Daphne sera de akel diya en delantre el maraviyozo arvole, el laurel alkual Apollon se va dezesperamente arrodeyar i lo va abrasar, dizyendo kuanto lo kere bien, i ke lo va kudyar siempre.
Es de este tiempo ke las ojas del laurel se identifikan a Apollon i son la emblema de la viktorya en la korana de los heros.
SAMANDAG, (la antigua Seleucia Pieria) konosida por su playa de 14 km. ande las tortugas caretta caretta vienen a deshar sus guevos. La gente no aman tanto nadar en esta playa por ke los ventos son muy fuertes i las olas son bastante danjorozas. Los habitantes kreyen ke Moshe Rabenu enkontro Khidir (es un siervo de Di-o ke esta mensyonada en el Coran i ke tiene una grande savyedura i saverisyo mistiko) en el lugar ande fraguaron una tomba de pelegrimage. Tienen la kostumbre de tornar syete o mueve vezes alrededor de esta tomba para ke les salga todo bien… Para ken lo kreye…
Un sityo ke todos vijitan es el tunel ke Titus Flavius Vespasianus ordeno de avrir en el anyo 81 de muestra era para salvar la sivdad de las inondasyones. Es un passaje de 1380 metros i se kavako en las rokas para realizarlo. Tiene 7 metros de altura i es ancho de unos 6 metros.
La playa ande todos preferan ir para banyarsen es en Cevlik, un puevlo de peshkadores de Samandag. Las aguas son kalmas i muy klaras.
Espero ke vos agrado este viaje a los sityos historikos del sud de Turkiya ma para dizir la verdad kon todo lo dezgrasya ke se esta pasando en Syria, el vizino de enfrente de Hatay (!), no es deltodo lo ke era antes de unos 3 anyos…. Judios kedaron muy pokos i las sivdades i los puevlos se incheron de emigrantes Syrianos dezesperados, suzyos, ambiertos ke tratan de sobrebivir komo pueden… Leshosssss!
Sharope blanco
SEFARADIMUESTRO
Istambul
