De la pluma de Sharope: PARA HANUKA! de Sharope Blanco

Ver todos los artículos de esta sección >>

PARA HANUKA!

Vide el sol briyando i me dishe ke vino
la hora de pintar las paredes. las puertas
i las ventenas de muestro sityo !
Tomi la furcha (brush) i lo allegri kon
las kolores del korason ! EL korolado
del amor i de la sangre komo la fraternidad.
EL roz para tener buena humor/matzavruah
i ver la vida » en rose » – toz pembe –
Ke mos se achileye el korason ! Espero ke
vos va plazer muestro kafe kon las kolores
kayintes !

Kaliya azer novitades por Hannuka ke es la

fiestad de la amistad tambien. LA SOLIDARITAD,
LA VALLIANSA, LA KERENSYA, LA ESPERANSA,
EL SAKRIFISYO I EL MIRAKOLO…. fiesta de Luz
en las almas….Va kompartir kon vozotros Hanukka
kada tadre kon las kandelikas de kolor ke vamos
asyender enjuntos.
– Es inviyerno i keremos arrekayintarmos delantre
de la las flamas del hogar en echando los lenyos
aryento

– kon una kupa de vino dulse kayinte i
klavos de komer aryento !
– Espandidos ensima de los kavesales de
velours/kadife i de seda i
– un tapet de pelush blankoooooo!

– I papel i kalemiko para eskrivir poeziyas
i sonyar :
. de akeyos amores ke nunka egzistyeron,
. de akeyas sivdades ke nunka mos fuimos,
. de akeyos kastilyos en las nuvlas blankas
komo algodon

. i el Unikorn ke mos aspera en la puerta kon
sus alas majikas para yevarmos al lugar ke
dezeyamos ir….

. O Pegasus en su splendor de kavayo de las agadas…
Bolando mas rapido del aire i de los ventos del sud…

. Bolandomos ensima de los deziertos kon arenas de oro,
. ensima de las altas montanyas kuvyertas de nieve
. i de los pinos ke abrigan los pasharikos yelandosen,
. ensima de los oseanos kon spuma blanka,

. olas ande moran las sirenas kon largos kaveyos blondos
. ande briyan las perlas de las lagunas profundas…

Sharope blanco
Sefaradimuestro

En esta seksion Sharope Blanco, fundadora de Sefaradimuestro, un foro en Internet para korrespondensia  sovre kultura sefaradi kon el buto de ranimar la kultura de los djudyos sefaradis,  va a partajar kon mozotros su penserios i kriasiones literarias.