eSefarad Noticias del Mundo Sefaradi
Medi Cohen-Malki es nasida i mora en Yeruyalayim, de padres ke yegaron de Izmir. Tiene estudios en la Universaidad de Yerushalayim, Profesora, poeta i kompozitora, konduse un program de radio en Kol Israel.
Mos eskrivira en esta seksion sovre distintos tema de la istroia, kultura i kostumbres sefaradíes i tambien de aktualidad, asigun sus investigasiones.
Ver todos los artículos de esta sección >>
«Entre Rosh Hashana i Kipur»
Estos dias mos azen sentir el trokamiento i el renovamiento, la alegria i tambien la tristeza, la kalor i la freskura, el pardon, el arrepentimiento i otros grandes i emportantes sentimientos.
Para mi, eyos son de nostaljia, kuando me topo en un enkontro de kaminos pensando del pasado i también del futuro.
A mi, ke me engrandesi en una famiya Sefaradi de Izmir, la savor i la aroma de muestros uzos, siempre me desha pensando a mi chikes, a muestras kostumbres tan espesiales de estos dias.
Antes de Roshana, siempre mos empesavamos a aprontar para esta selebrasion. Alimpiavamos muestra kaza komo si fuera antes de Pesah: lavavamos los perdes, «dezmontavamos» la kuzina, mos metiamos a arresentar los almarios, para tener mas lugar en eyos i en muestro korason. Mos ivamos a merkar vestimientas muevas, de buena kalidad, kon chapines de lustrin i fostanes de dantelas i de velur.
Despues de todo esto mi padre se iva al charshi (al merkado) para merkar los pishkados, la prasa, la fasulia i la fijon, los datiles i las agranadas, la kuchunduria i las mansanas.
La demaniana, de la noche de Rosh Hashana, mos metiamos a terminar los echos de kaza adjustando las flores i los manteles brodados, bien kolados.
I, kuando, a la fin, ya mos asentavamos al derredor de la meza de fiesta, mos felisitavamos i mos bezavamos, mos pasavamos regalos i diziamos:Tizku lashanim rabot vetovot»
I ke avia sovre la meza? el dulse de la mansana kon almendra blankeada, la asukar en el salero i todas los otros Yehi Ratsones.
Empesavamos kon el pishkado i las kefrikas de prasa, despues vinian las salatas (espesielmente de kuchunduria i de vedruras -porke no uzamos a komer la berendjena en esta fiesta- i se servian tambien las otras kumidas ke una de eyas era la fijon.
Me demandash: onde se topan oy estos uzos i estas kumidas? Vos aseguro ke en mi kaza, kon el ayudo de mi madre, ke biva muchos anyos.
La demaniana, mos ajuntamos todos kon el dezayuno de los boyos i las burrekas (I komo no? tambien un poko de raki-rakidjik), komiendo estamos i beviendo las aromas i las savores de muestra tradision.
Pasan unos kuantos dias i viene el dia de Kipur.
Uno de mis rekuerdos de este dia es este de la tormenta, kuando golgo el guezmo de la kanela del Magen David sovre el sutlach de arroz i, tambien, de los travados ke me yaman de leshos, asperando a komermelos kon una buena kupa de subia (pipitada).
I yo vos aseguro, ke siempre kontinuo a prezervar muestra bendicha tradision, ke para mi, es la mijor del mundo.
Anyada Buena I Gemar Hatima Tova a todos vozotros.
Entre Rosh Hashana i KIpur
!!Cuanto entrañable recuerdo nos comparte aqui Medi Cohen, coincidiendo con estos tan señalados dias de Tishri!! …
No pocas veces, la nostálgia hace en ellos en efecto, su aparicion , y nos lleva a rememorar escenas familiares perdidas en la nebulosa del tiempo, que pretendemos ahora rescatar y transmitir, con toda su carga emotiva y tradicional, tal como entonces las vivimos, a fin de que sirvan de testimónio a las nuevas generaciones, de un legado que preciso preservar …
Shaná Tová a todos, y por anticipado tambien Gmar Jatimá Tová …
Con todo Afecto …
A la querida Medí, le agradezco estos recuerdos dichos al modo de muestros padres que vinieron de turquia y grecia. Cuando lei este escrrito » pishi los oshos » por la nostalgia, por recuerdos que de mi niñéz me trusheron. Lástima que no tuve suerte de consrguir una musher que sintiera como suya esa bendicha cultura que hoy añoro.