eSefarad Noticias del Mundo Sefaradi
El 11, Desembre…tuvimos muestro enkontro del anyo de muestra organizasion, i por musafires espesial i de onor, tuvimos a Rosina Karako Smeraldi (una de las moderaderas de Ladinokomunita) su marido Gomy , i su ijo Jack Karako i famiya.
Jack Karako es el uno ke tuvo un suenyo de empesar un grupo de sefaradim en Palm Beach County 20 anyos antes i vino a realizar este suenyo! Es en el ‘clubhouse’ de Rosina vente anyos antes ke mos enkontrimos para formar este grupo i tambien el grupo de ‘Echar Lashon’
Despues ke Jack Karako mos djuro a los miembros del Board, prezento muestra Presidente, Rose Papo Allen, a Jack i a Rosina unos ‘plaques’ onorandolos i avlando por lo ke eyos izieron para empesar muestro grupo i el grupo de ‘Echar Lashon’.
Por la okazion, prezentaron la klasa de ‘Viva Ladino’ unos ‘sketches’ en Ladino de las kostumbras de muestros padres, muy komiko i tambien amostrar lo ke estan ambezando en las klasas de ‘Viva Ladino’. Los partispantes eran los miembros de la klasa i los maestros. Bravo! a todos ke partisiparon i espesalmiente a Ray Mishula ke eskrivio los ‘sketches’!
Komo a la semanas ke viene empesa muestra Fiesta de Hanukah, se asiendieron la Menora de esta okazion i la famiya de Rosina i Jack Karako asendieron los parmachetes, i tambien, muestro President de anyos pasados, David Lagnado, disho las bendisiones.
Kantimos Maoz Tsur todos en djunto i despues, mos fuimos al salon para komer i sintir a ‘Yanni’ tanyando el keyboard i la djente estavamos bailando a la Turka i Grego i komiendo, borekas, biskochos, guevos enhaminados, Baklava, ets.
Tambien tuvimos por musafir onorado, Henry Levi ke salvo del Olokosto i ke era Selankli, kon su mujer, ke moran aki en Palm Beach County. Puedeser ke uvo mas de 200 personas! Siempre ke seya okaziones de alegria! Una tadrada inolvidable!
Karinyos i saludos a todos de
Daisy
de Florida, USA
————————————————————————————
Keridos miembros …komo meldatesh lo ke eskrivyo Daisy, la Federasion Sefaradi de Palm Beach komplo 20 anyos
i se organizo una grande fiesta, onde aviya mas de 200 personas.
Estuvo muy bien organizado kon el imenso lavoro de la presidente Rose Allen Papo i sus lavorantes ke para organizar un lavoro imenso se kere manos.
Yay 10 anyos ke yo me mudi al sud i no tuve okasyones de ir a verlos. En esta okasyon komo mi ijo fue envitado i el mos yevo.
A dizirvos la verdad, me enseli de ver tanta gente. Me akodro ke kuando ampesimos era solo unos 30 personas ke vinyeron en el klub del apartamento ke yo morava. i dospues en los 10 primeros anyos teniyamos komo mas de 100 miembros….
agora se tresdublaron.
Me akodro ke el presidente (dospues de mi ijo) i David Siman (ke era miembro de LK del empisijo) en los arekojimyentos del bordo diziya «se kere manos para mantener bivo una federasion» I agora viendo todo lavorando bueno me enseli i me gusti en el mizmo tiyempo…
Vide el grupo ke izyeron el sketch «Biva Ladino» me akodri del ke aziyamos i lo yamavamos «los pregoneros». Vide la damma ke eskrive estos «sketches» i me akodri de los ke eskriviya yo (dayinda los tengo guadrados) i las kantikas ke kantaron me izyeron akodrar las ke kantavamos kon Daisy i su gitara…
Se asento al lado de mi muestros amigo de LK Elias Barrocas i estuvimos avlando por oras komyendo en el mizmo tiyempo
Komo vos eskrivyo Daisy mos onoraron a mi ijo i a mi kon una plaka i mos dieron regalo el livro de poezias «UN RAMO DE POEMAS» de Haim Vitali Sadacca.
Entre el grupo de gente presentes yay unos kuantos miembros ke mos meldan solo en LK, komo Terry Namer i su marido.
Me disho: «Rosina no meldo todo ..miro onde eskrives tu i Rachel la balabaia ke ya la konosimos 2 anyos antes kuando vino para el aniversario de Daisy, las dos lo ke eskrivish me parese komo si estamos asentados i mo lo estash kontando…..»
Yo en eskapando mi chika avla dishe a los presentes ke no deshi mi ladino i yo kontinuo kon el sitio Ladinokomunita …ken kerera ke tome de Daisy el adreso i vos azeremos miembros…
Fue un diya inolvidable!!!!!!!!!!!!!
Aki esta la foto mi ijo, yo i la presidente.
Abrasos
Rosina
de Florida
Fuente: Ladinokomunita
