eSefarad Noticias del Mundo Sefaradi
La Universitad Avierta a La Tresera Edad, de la Universidad Estadual de Santa Cruz, de Ilhéus, Bahia, Brasil, komiensó su kurso ekstensyonal
«Arte i Kultura del Puevlo de Israel«.
Fiestas, Lenguas, Artes Visuales i, komo no, komidikas de los muestros son presentadas a un puvliko avierto a todos, siempre muy interesado por konoser el oridjin de munchos de sus kostumbres.
El kreador i maestro de esta eksperiensya es el Profesor Arkitekto Guilherme Albagli de Almeida venido de una mishpaha de la Kaleja de Karatash, Izmir, Turkia, ke paso al Brasil en los anyos de 1920.
El Gobiernador del Estado de Bahia Jacques Wagner, djidió bueno askenazí ke alumbra las hanukiot de Hanuka, en plaza puvlika autorizó este kurso por todos los semestres venideros, en los jueves (iomim hamshiim), dospues
de las 10:30 de las manyanas, en la sala de la «Universidad Avierta a la Tresera Edad (UNATI)» para los mas aedados ke 50 anyos, ama los mas djovenes pueden partisipar komo oyentes.
La UESC, Universidad Estaduala de Santa Cruz esta en Ilhéus, Bahia, ande estuvo la primera biblioteka privada de las Amerikas kon libros en Ivrit (S.XVI).
Munchos anusim bivieron aki, komo Felipe de Guillem, ke dospues pasó a Salvador, donde fue konsejero en la Kamara lokala i endjeniero urbanista. Organizó las primeras entradas al interior del país, en la buska de piedras i oro.
En el empesiko del Siklo XX yegaron merkaderes rusos i polakos solterikos i pokas famiyas ke dospues se fueron a Rio i algunos de estos lavoraron en el teatro, musikales i televisyon.
Sefaraditas de Turkia tambien bivieron aki ama salieron kaji todos al Sur del pais, solo kedando famiyas kon la alkunya Chikurel, Albagli, Pardo, Saragussi.
Agora, munchos bnei anusim se vuelven a praktikar la Muestra Ley, se sirkunsidan, meten chapeyos negros de abas largas i afilu peyot delantre de sus orejas.
El haham shabat viene algunas veses aki, kuando vijitan Itakaré, un resort de playa vizino muy muncho konosido por turistas ekstranjeros, munchos de eyos de Medinat Israel i Amerika.
A todos los ke konoskan sites en la web kon lindas imagenes de sinagogas, mozaikos, tekstiles, metalurjia o iluminuras djudías, se roga ke lo informen al email guilhermealbagli@hotmail.com
Salud Komplit i Echos Buenos a Todos de este Boletin eSefarad.
Kon Karinyo
Guilherme Albagli
