eSefarad Noticias del Mundo Sefaradi
Keridos amigos i amigas.
Munchas eran del Ebreo i otras kontenian nombres de sitios en Espanya. Unos tomavan nombres de sus okupasiones i otros se konsentravan sovre los nombres de los orijinarios del pais tomando un aspekto extranjero para eskonder sus identidades. Pero estava eskrito siempre en el Serificato de Identidad a ke rasa i relijion apartenian. Los forsavan mismo a vestirse en vestidos desinyadas a estos grupos para ke los vean komo ajenos. La sosiedad era divizada entre «Musulmanos i los ke no eran Musulmanos» «Muslum i Gayri Muslum» de la misma Nasionalidad. Kada grupo tenia su etnisidad partikular kon su istoria i erensia.
——————————————————————————-
ALKUNYAS DJUDIAS
Unas indikan el lugar de orijin komo SLONIM ke es la Polonia i MOSCOWITZ ke es la Rusia. BRODIE es Berlin. En Ingletierra en mi kongregasion tenia uno ke se yamava LONDON i ke venia del Este de la Evropa. Ay alkunyas ke tratan de las Okupasiones komo SHNEIDER/Shastre, STOLLER/ Karpintero, LEHRER/Profesor, KREMER/Uno de la tienda. En mismo tiempo ay alkunyas de profesion en Ebreo komo SCHOCHET, DAYAN, CHAZAN, CHAMACH, RABINOWITZ ets.
Unos son Patronimos ckomo ABRAMSON, ISAACSON, JACOBSON, ARONSON i YANKELEWITZ. En siertos kavzos la alkunya ke se toma dependia del Imperio Austro Hungaro ke tuvo ke azer kon los ofisiales del governo. Eran nombres buenos i nombres malos. El bueno era GOLD i SILVER i el malo era SPIELVOGEL/Uno ke juga i DREYER/Uno ke enganya. GANZ /Pato i BOCK/Vaka. Unas alkunyas tratavan del statuo komo COHEN i LEVI i sus variasiones.KATZ/Igual a COHEN I COHEN/Igual a TZEDEK/Justo. CASHDAN/Kohanei Shluhei de Rahamana Ninhu/Representativo del Dio AZOULAI/Isha Zonah Vachalucha lo Yikoschu/Mujer kon ken no se kaza.
KAPLAN es COHEN (Chaplain). En unos paises se representan los dignitarios de la iglezia. No kada COHEN es un COHEN. Los ke vinieron del Este trokaron sus nombres kuando los ofisiales no puedian pronunsiar estos nombres, en jeneral Polakos.pensavan ke kada djudio era COHEN.
Trezladado por Shimon Geron, Sydney
—————————————
En Turkia en la armada los sarjentes no puedian pronunciar mi nombre Shimon i me yamavan «SHIFON ne karin agrisisin?»
En los paises oksidentales Simon era un nombre bien konosido i munchos tenian nombres djudios. pero la alkunya Geron la mesklavan kon Gron o Green.
Para fasilitar eskojia de yamarme de lo ke se aserkava de esto en kada pais. Por egzemplo Simone en Italia, Semion en Rusia, Zimon en Alemania, Shamun entre los Arabos, i los Turkos me yamaban Sinan. Kuanto a mi mujer, el nombre Annick aparesia extranio. Mismo los ijos la yamavan Aguk.
Mi alkunya era Gueron i estaba eskrito en mis dokumentos ke era Geron i termino ser Jeron en Franzes. En Espanya me yamaron Geronimo. Kada vez ke pronunsiava mi nombre a la manera del pais me tomavan por uno de eyos. Ke aksento tenia i a ke nasion apartenia no se savia. Munchos me tomavan por un Sud Amerikano paresiendo a Castro. Los djudios no se yerravan pero a vezes me tomavan por un Arabo. En Turkia paresia a un Amerikano siendo alto i delgado. Dizian «Bu adam sulak bir yerde buyudu.» En la armada era ‘Telegraf Diregi» i kon mis antojos, Doktor.
Fuente: Ladinokomunita
