eSefarad Noticias del Mundo Sefaradi
Zelda Ovadia, espesialista en lengua djudeo-espanyola, mos avlara en esta seksion sovre “LOS KALES D’ESTAMBOL”, aki mos va a komentar sovre todas las sinagogas de los distintos kuartieres de esta antika sivdad, las desparesidas i las aktuales.
LOS KALES DE HASKÖY
Haskoy o kon su antiguo nombre, Picridion, fue una de las mas antiguas lokalidades d’Estambol en las kuala se avian aresentado djudios ainda antes de la Ekspulsion de Espanya, en 1492.
Kuando el komandante de la tresera kruzada, el imperador alman Conrad III, avia desidido de pasar por Estambol, el imperador bizantino de akeya epoka, Manuel Komen avia deshado su palasio i se avia abrigado en el kuartier djudio de Haskoy, komo lugar mas seguro.
Haskoy, situada a la oriya del Kuerno de Oro, el Halich en turko, fue, komo su kuartier vizino, Balat, ke se topa en la otra oriya, povlado en su mayoria por djudios sefaradis. Los kuartieres mas konosidos de Haskoy eran: la Kaye de Abasho, Maalem, Arabadjilar, Sheyh Salih, Kordova, Yenimahalle, Sarayiko i Piri Pasha.
Las dos sinagogas mas importantes de Haskoy eran la de Cordova, konstruida por los djudios ke avian sido ekspulsados de Espanya, en 1492, i segun lo indika su nombre avian yegado de la sivdad de Cordova, en Andalucia, i el Kal Mayor. A la vista ke el Mayor avia sido fondado por djudios ke avian yegado a Haskoy de las Izlas Mayorkinas.
Una otra sinagoga, la del kuartier Yenimahalle, fue fraguada sovre una kolina. Su patin era de marmol i su interior dekorado kon muncho luso. Durante la II Gerra Mundiala eya sirvio de abrigo a los soldados turkos. En una inskripsion sovre una de las paredes de la sinagoga fue dicho: «Esto fue eskrito por Mustafa Alahalil. Aki es una iglesia djudia.» Kon la data de 20 de Oktobre 1945.
Malgrado la demanda del Bet Din de serrar esta sinagoga, en 1949, por falta de abitantes djudios, eya continuo a dar servisios, aun ke kon munchas difikultades, siendo ke topar un minyan, o sea 10 ombres para kumplir las orasiones ya no era mas possible i kedo avierta asta los prinsipios de los anyos 60 del siglo pasado.
De investigasiones echas en diversos dokumentos sovresale ke el kal del kuartier Sheyh Salih ya fue serrada ainda antes del 15 de Disiembre 1944.
En 1950 la aristokrasia de Haskoy ya no existia mas. Todos sus abitantes ya avian pasado a morar en muevos kuartieres, mas modernos i komodos, los kales fueron serrados el uno detras del otro.
A la vista ke el uniko kal ke esta ainda avierto en Haskoy es el de Maalem.
