eSefarad Noticias del Mundo Sefaradi
Ziona Tagger
La istoria de la vida de la pintora Ziona Tagger (prononsado komo Tsiona Tadjer) es un exemplo tipiko de la Aliya (imigrasion sionista a Erets Israel) de los sefaradis.
Los eskritores i investigadores israelis uzan avlar de la Primera Aliya, de la sigunda, tresera, la kuatrena… o mizmo de la aliya de los paizes orientales o de Almania.. ma no mensionan la aliya de los sefaradis. Los ke vinieron de Turkia, Gresia, Bulgaria, Kroatia, Bosnia i Makedonia kedan en el olvido.
La verdad es ke los olim sefaradis ke yegaron de estos paizes vinieron a Erets Israel por puro sionizmo i eyos se aresentaron komo pionieros en varias partes del futuro Israel. Los vemos en el kibuts i en el moshav, en los portos, en la medesina, la agrikultura, la industria i la kultura i mas.
Ziona era la ija de Samuel Tagger ke vino a Yaffa en 1879 kon el grupo del haham Avraam Mevorah de Sofia, en Bulgaria. El i su mujer Sultana Behar fueron de los primeros pionieros del grupo “Ahuzat Bait” ke empeso la konstruksion de la futura Tel Aviv. Ainda antes de esto lavorava en la produksion de kueros, en Yaffa.
De parte de su madre tambien Ziona era desendiente de djudios de Bulgaria. Su papu i su bava maternales, Yeshayahu Behar i Reina Mashiah avian yegado en 1880 de Bulgaria a Yerushalayim onde fondaron una fabrika de tabako i fueron de los fondadores del ospital “Misgav Ladah”.
Ziona Tagger nasio en 1900 en Yaffa, estudio pintura en klasas privadas i en 1921 paso a estudiar en la Akademia Bezalel. Eya kontinuo sus estudios en Paris onde partisipo, ya komo pintora konosida, en las aktividades del famozo “Salon des Independants” en Paris.
A su retorno ya tenia fama de buena pintora i eya tuvo ekspozisiones en Palestina i Evropa. Fue de los ke en el anyo 1934 fondaron la “Asosiasion de Pintores i Eskultores Israelis”.
En 1840 interumpio su aktividad komo pintora para servir en las fuersas armadas inglezas, en la II Gerra Mundial. Despues de esta gerra entro a la ‘Hagana afin de luchar por la independensia de Israel. En los anyos 1960 paso de Safed a Tel Aviv afin de poder pintar mas la sivdad ke su padre i su madre ayudaron a fondar.
Su estilo fue kubistiko-naivo, tomando siempre en kuento los temas del Oriente i de la mar.
Unas pinturas de Ziona Tagger
Ziona Tagger murio en 1988. La munisipalidad de Tel Aviv onoro su memoria en dando su nombre a una de las kayes de la sivdad.
Fuente: AKI YERUSHALAYIM #96
