eSefarad Noticias del Mundo Sefaradi
Zelda Ovadia, espesialista en lengua djudeo-espanyola, mos kontara en esta seksion sovre “Uzos i Kostumbres de los Sefaradís en Turkia”, ande mos va a avlar sovre el siklo de vida empesando por el kazamiento i todo lo ke esta atado a este evenimiento: ashugar, banyo de novia, ketuba i mas…i despues paridura, fashadura… i ansi asta la fin de la vida. Komo lo dize el refran: “De la fasha a la mortaja” (de la faja a la mortaja).
PARIDURA I BRIT MILA
En el pasado i ainda a los prinsipios del siglo 20 kuando los partos tenian lugar en kaza, kon el ayudo de una komadre, el marido en primer lugar i la famiya serkana asperavan kon emosion i kuriozidad kualo va naser. Si nasia ijo i si este el primer parto de la djoven madre el era resivido kon grande alegria. En siertos kavzos el nasimiento de una ija era resivido kon yelor al seno de la famiya. Komo ya lo dishimos «ija de kazar, nave d’enkargar», ma avia una otra kestion: la kontinuidad de la dinastia i naturalmente del nombre de famiya.
En los ocho dias despues de la paridura la rezien parida nunka kedava sola, para ke no sea ekspozada a los malos espiritos. Eya era akompanyada por su madre, su esfuegra o otras mujeres de la famiya.
En el interval de estos dias eya kaji ke no abashava de la kama i resivia kudyos espesiales. Una de las «komidas» ke le eran servidas eran las revanadas de parida. Estas son revanadas de pan untadas en la leche i guevo i fritas, serviadas kon miel o asukar. Dizen ke eyas azen abashar leche.
La parida se echava en una kama espesial yamada «kama de parida», ke era kuvierta kon savanas brodadas i kon una kolcha yamada «kolcha de parida».
Una de las misiones mas importantes era de protejar a la parida i al rezien nasido del ojo malo. Antes de todo se metia sovre el kavesal de la parida un ramiko de ruda i un ojiko blu. Sovre el kavesal del bebe se metia una hamsika de oro, ke es un djenero de «djoya» en forma de mano, ke tiene sinko dedos i de ayi su nombre: hamsa, en arabo sinyifika sinko i ademas de esto un livriko de Tehilim i tambien un ojiko blu.
La viola i Brit Mila
La noche de antes del brit se yama «noche de viola», en ebreo es yamada «leyl shemira» (noche durante la kuala los partisipantes no durmian).
En esta noche se arekojian, la famiya, keridos i amigos para selebrar el nasimiento del rezien nasido. El rava azia una derasha (sermon) i terminava sus palavras kon el kadish i los musafires se djuntavan a el. Se kantavan kantes en ebreo i en ladino i la alegria era grande.
El fadamiento o fadas
Kon una seremonia ke se yamava fadamiento o fadas se dava nombre a la rezien nasida i tenia lugar en la mayoria de las komunidades djudias de Turkia i de los Balkanes. La seremomia se azian en kaza o en la sinagoga, en prezensia de envitados, de un rabino i un minyan. Despues ke el rabino dava el nombre a la kreatura i la bendizia, eya apasava de una mano a la otra i todos le auguravan mazal bueno. La rezin nasida era vistida kon un fostaniko de seda i adornada kon djoyas, uzo simboliko para asegurarle rikeza i una vida oroza.
[print_link]
Estimada Zelda:
Me enkanta lo ké eskribes sovre los muestros, más o ke le pido ahora es saver la real significacion del termino «djoya» ke te rifieres.
Komo mi ladino es de un djohá te pido ke eskribas en português, español o en englis.