eSefarad Noticias del Mundo Sefaradi
Keridos amigos i amigas
Vengo de resivir el «Buletin de la Sinagoga Sefaradita» de Sydney. Entre tantos artikulos interesantes avia uno ke tratava de un Rabino Alto «Shlomo-Eliezer Alfandri» nasido en Istanbul en 1820 i muriendo a la edad de 110 anios en Jerusalem. Pensi ke esto por sierto iva interesar a los muestros i me meti a traduzirlo.
Saludes a todos.
LA BENDISION I SU KONDISION
El Rabino «Shlomo-Eliezer Alfandri» nasio en Istanbul/Turkia en 1820. Mismo kuando era un manseviko, inspirava altura grande. Por esta razon el fue apuntado al Konsillio Espiritual de Istanbul. Munchos djudios kerian ke se aga el HAHAM BASHI i ke entre en la Korte Rabbinika. El refuso i prefero de devuarse al Estudio de la Tora. Tampoko kijo meterse en los trajes/vestidos de los eskolares ke eran el turban en la kavesa i ropa de seda. Kuando la djente lo yamavan «HAHAM BASHI», les dezia ke no era mas ke un Rabino ordinario. Los djudios de Istanbul apresiando su altura se desideron de avrir una Yeshiva para el. Munchos eskolares se ivan ayi para azer sus estudios. Un elevo muy distingido era «Rav HAIM CHIZKIYAHU MEDINI «ke termino ser el HAHAM BASHI de Hebron. avia eskrito la Ensiklopedia «SDEI CHEMED». Este ombre servio después en Damasco komo el HAHAM BASHI.
En 1904 el viejo Shlomo-Eliezer Alfandri demissiono i se fue en Aliya a la Tierra Santa. Se instalo en Haifa estudiando sin disturbio por unos kuantos anios. Kuando los savios de Safed oyeron ke este Rabino avia echo Aliya a Israel, le demandaron ke sirve komo Juez en el Rabbinato de ayi. Shlomo- Eliezer aksepto esta posision mismo teniendo 90 anios i lavoro kon eyos por kuaji 20 anios.
La djente lo yamavan «SABBA KADISHA/Avuelo Santo». En April 1914, el Rabino akompaniado por su entourage se fue a Bendizir La Luna Nueva. Subito al fin de la orasion, miro al sielo i echo un grito disiendo «Veo una gerra ke esta viniendo». Djusto 4 mezes después eklato la guerra i los abitantes de Safed no tenian de kualo komer i bever.
Un dia el Governante Turko, el PASHA, pasa por ayi subido en kavayo. Tenia un uniforme kon medallias en el pecho, amostrando ke era de un rango alto. El Rabino se prepara para resivirlo. El PASHA al verlo le demanda ke le aga una bendision. A esto responde el Rabino disiendo «La bendision es echa para los ke son umildes i modestos. Abashate del kavayo i te bendizire». Ansi fue ke el Pasha se abasho de su kavayo, abashando tambien su kavesa para ser bendizido. El Rabino en su bendision disho «El Dio Todo Poderozo ke te ayude en tus esforzos para abastezer a los menesterosos de la Nasion Judia». Este djesto impresiono tanto al Pasha ke el se aseguro ke los residentes de Safed tenian siempre de kualo komer i bever.
El Rabino Shlomo-Eliezer Alfandri se murio a la edad de 110 anios en 1930 en Jerusalem.
——————————————
Trezladado por Shimon Geron. Sydney
Fuente: Ladinokomunita
