Una Komunitad Olvidada: Los Djudyos De Edirne por Gad Nassi

La istorya de la komunitad djudiya de Edirne es uno de los mas impresyonantes kapitolos del Djudaizmo. Es en la epoka de la destruksyon del Segundo Templo ke los djudyos se establisaron por la primera ves en esta sivdad – de muestros diyas, en la frontyera norte de la Turkiya, entre la Gresya i la Bulgariya. Asta el arivo de los djudyos emigrados de la Evropa a Edirne despues de su konkesta por los Otomanos en 1362, egzistiyan en esta sivdad una komunitad romaniyota i una komunitad karayita.
Basho la dominasyon bizantina, las komunitades djudiyas sufriyeron de diversas restriksyones. La konkesta de Edirne por los otomanos fue por eyas el empesijo de una epoka de libertad. Les fue akordado de pratikar libramente sus relijyon i konformamente a la demanda de los muevos dirijantes, los djudyos prokuraron la mano de ovra i fueron aktivos en el komersyo, kontribuando ansi, al desvelopamyento de la sivdad.

Djudyos persekutados de los payises de Eshkenaz, de la Evropa Oryantala, de los Balkanes i mizmo antes de la Ekspulsion, de la Italya, de la Espanya i de Portugal empesaron a emigrar a Edirne. En 1376 i en 1394, kon la ekspulsion de los djudyos de la Hungariya i despues de la Fransya, arivaron en ondas a Edirne, djudyos de estos payises. La gerra kon la Rusiya (1877-1878), trusho a Edirne serka de 4000 djudyos fuyendo los masakros en la Bulgariya.

Despues de la konkesta otomana i durante toda su istorya , Edirne fue, por las komunidades djudiyas de la Evropa, un refujio seguro i la esperansa de una mueva vida, asigun ke uno de estos refujyados, el Rabino Itzhak Tzarfati aviya anonsiyado, muncho mas antes de la ekspulsion de los djudyos iberikos:
«Veni al payis de Togarma (Turkiya), ande no manka nada …porke el kamino a la Tyerra Santa pasa por aki …i poderej bivir aki en seguritad en vuestra vinya i basho vuestro arvole de igo….»

Kon el arivo masivo a Edirne de los djudyos de la Espanya i de Portugal despues de sus final ekspulsion, empeso por la populasyon djudiya de la sivdad una mueva erea de desvelopamyento de punto de vista demografika, su lingua i sus tradisyones. Se formaron muevas komunidades sefaradis ke kontruizaron sinagogas al nombre de las sivdades o rejyones de ande arivaron. Ansi se fondo en Edirne en la meatad del siglo XVI, la primera imprimeriya onde fueron imprimados ovras relijyozas en Ebreo.

La Epoka de la Haskala
Los djudyos de Edirne fueron influensados por el movemiento de Haskala, partizante de la emansipasyon de los djudyos de la Evropa. El oryantalisto i linguisto Jozef Halevi, ovro en Edirne en la segunda meatad del siglo XIX para difuzar la konosensya del Ebreo i para la renesensya nasyonala en Eretz Israel. Jozef Halevi es konsiderado komo el mesajero de la Haskala en Edirne. A su demanda se fondo en Edirne, la primera eskola de l’Alliance por jovenos en 1867 i despues, la primera eskola de l’Alliance para jovenas. Los institutores de l’Alliance empesaron a ensenyar en la eskola de Talmud Tora ande meldaron maz de 800 elevos i kon tyempo todas las eskolas de Talmud Tora se trokaron en eskolas modernas i organizadas, onde la edukasyon era bazada sovre el ensenyamyento del Fransez, del Turko i del Ebreo, de la istorya djudiya i de la istorya de la Tyerra Santa i de ofisyos komo la kontabilitad i el tekstil. En las eskolas de l’Alliance, meldaron en mizmo tyempo elevos non-djudyos komo, turkos, gregos, ermenis i bulgaros. Despues de sus estudyos los elevos de l’Alliance, se dipersaron en otras sivdades, ande fueron angajados en la edukasyon i mizmo en la administrasyon.

En 1891, kon la inisyativa del Rabino Avraham Danon se fondo en Edirne el Beit Midrash para los estudyos rabinikos basho el ensenyamyento de l’Alliance. Fina este tyempo, los rabinos en el Oryente no resiviyan una edukasyon jenerala i no konosiyan linguas evropeyas. En este seminar meldaron elevos de diversos payises del Oryente i de la Tunisiya, ke fueron akseptados despues al Beit Midrash Rabiniko del’Alliance en Paris, antes de ser enkargados en tanto ke rabinos en sus payises de orijin. Avraham Danon en uno de sus raportos al Konsilyo Santral de l’Alliance eskrive: «Grasyas a la fuzyon reushida de la edukasyon santa i sekulara, los diplomados de muestro seminar son personas relijyozas i en mizmo tyempo aklaradas, atadas kon fervor a la relijyon de muestros avuelos, konosen en mizmo tyempo los konseptos del progreso i las nesesitadas de muestros tyempos.»

Avram Danon ke ovro en los domenos de la investigasyon istorika i de la kreatividad literarya era uno de los fondadores de la asosyasyon Dorshey Haskala (solisitadores de la Haskala) ke fue aktiva en la difuzyon de la istoriya djudiya i de su filozofiya. Publiko el peryodiko en Ebreo i en Djudeo-Espanyol, Yosif Da’at (anchear la konosensya) ke su titolo en Djudeo-Espanyol era El Progreso. Este peryodiko de orden istoriko i literaryo fue obligado de aretar su publikasyon achakez de su opozisyon a la monarshiya de Abdulhamit II.

Una otra figura emportante de esta epoka en Edirne, es el Rabino Baruh Mitrani. Mitrani fue despues de Yosef Halevi, uno de los prekursores de la renesenya del Ebreo moderno, ovro kon fervor entanto ke edukador i jurnalisto para el retorno del puevlo djudyo a la Tyerra Santa. Durante anyos enteros dirijo una eskola, ke el fondo i ande fueron ensenyados la istorya djudiya, el Ebreo, el Turko i el Fransez. Su livro sovre el ensenyamyento del Ebreo, Hinuhey Banim (edukasyon de los ijos) fue en su tyempo un livro klasiko en su domeno.

El Rabino Mitrani era konvensido ke toda edukasyon relijyoza deve ser akompanyada por la konosensya del patrimonyo kultural non-relijyozo i de un ofisyo. Mitrani bivyo en nesesidad, erando i kuaji arastandose de sivdad en sivdad, todo en dedikandose a una aktividad literaria i didaktika enfatigable en publikando diferentes ovras i peryodikos en Edirne, Viyena, Yerushalayim i en Sofya(1).

Jozef Niego, despues sus estudyos en la eskola de l’Alliance, termino sus estudyos de agronomiya en Montpellier. Niego dirijo durante 18 anyos, la eskola de agronomia Mikve Israel en Eretz Israel. En esta peryoda fue vijitado por el Kayzer de Prusya, Wilhelm II i por Theodor Herzl. Niego parkuro en tanto ke reprezente de la Sosyetad por la Kolonizasyon Djudia, JCA, las komunitades djudias de la Turkiya i de Eretz Israel, kontribuando ansi a la kolonizasyon por los djudyos de Eretz Israel i al desvelopamyente de la agrikultura del payis.

Niego fue el fondador de la Organizasyon Bene-Berit en Estanbol i su prezidente. De muestros diyas, egziste en Israel una lodja de esta organizasyon a su nombre, fondada por los orijinaryos de la Turkiya.

Los nombres de Yom-Tov Behmoras, i de Itzhak Elia Navon, meritan i eyos de ser akodrados. Behmoras publiko el peryodiko Toldot Ishim (istorya de las personalidades) i se establisyo en Eretz Israel. Navon publiko una antolojiya de kantes i ovro por la renesensya del Ebreo. Kon su entervansyon en Estanbol, fue obtenido el permeso nesesaryo para la publikasyon en Yerushalayim del peryodiko en Ebreo, HaTzvi.

*

Despues de su konkesta por los Otomanos, Edirne fue la kapitala del Imperyo fina la konkesta de Estambol en 1453. De mizmo, en la segunda meatad del siglo XVII, los sultanes otomanos preferaron a aresentersen en Edirne i dirijir de aya los echos del governo. Se batisyo en Edirne ovras de arshitektura de grande valor, entre eyas la famoza meskita Selimiye, i enfloresyo en la sivdad una aktividad kulturala de las mas prosperas. Durante siglos enteros, Edirne fue el segundo sentro politiko i kultural del Imperyo otomano, despues de Estambol.

En el siglo XVIII, Edirne kon su populasyon de 350.000 almas era la kuatrena sivdad de la Evropa. Portante, diversos dezastros no mankaron de aharvarla, komo los fuegos grandes; la famina provokada por las gerras kon la Rusiya i los payises de los Balkanos; su okupasyon por los Rusos en 1829, por los Bulgaros en 1913 i por los Gregos en 1920. Kon tyempo Edirne perdyo de su emportansa i se deskayo a un nivelo modesto kuaji en todo los domenos.

Ay de akodrar dos evenementos emportantes de la istorya djudiya, atados a Edirne. El Rabino Yosef Karo, antes de emigrar a Eretz Israel, redakto en Edirne, en la primer meatad del siglo XVI, su ovra, Beyt Yosef, ke fue mas tadre el manadero por la redaksyon del Shulhan Aruh. Ansi ke en la segunda meatad del siglo XVII, la konversyon al Islam de Sabetay Sevi en Edirne.

La istorya de la komunitad djudiya de Edirne, es atada en munchas puntas de vista al proseso de desvelopamyento i de la dekadensya de esta sivdad. Kon sus eskolas, sus ovras de biyenfezensyas i sus organizasyones sosyalas i kulturalas, la komunitad djudiya de Edirne estuvo kontinuando a enfloreser en los empesijos del siglo XX. Entre 1911-1918, su populasyon djudiya kontava 28.000 almas. Portante, mas tadre, despues de la deklarasyon de la Republika en la Turkiya, los djudyos de Edirne sufriyeron de la onda de antisemitizmo en el payis i de los evenementos de la Trakya en 1934(2) i empesaron a abandonar la sivdad. En esta periyoda amarga de la propaganda nazista i sus konsekuensas, empeso el egzodo de los djudyos de la Turkiya. Munchos Djudiyos de Edirne arivaron a Eretz Israel i partisiparon a la Gerra de Endependensya.

Durante su istorya, de la komunitad djudiya de Edirne salyeron rabinos, institutores, ombres de ofisyos liberos i fonksyonaryos altos, ke difuzaron los rayos de luz en las tyerras serkanas i aleshadas. De muestras diyas, esta komunitad no egziste mas. Solo, las ruinas de su Grande Sinagoga, son puedeser el triste testimonyo de su pasado gloryozo.

Gad Nasi

(1) Por mas detalyos sovre Baruh Mitrani, ver el artikolo en Aki Yerushalayim, Mayo, 2000 XXI, 63, pp. 15-20.
(2) Durante estos evenementos, una parte de la populasyon turka devasto las kazas, las butikas de los djudyos i las sinagogas, en atakando los fizikamento.