UN YOSE KE LOS DOLARES TROKARON EN "PEPO" O EN "MISTER JOS"

Moshe Kazes i Sadik Gershon: Los kantes populares de Sadik I Gazoz, Saloniki 1929, p. 10

(Kuple 1 )
Antes de partir para Nevyork,
Preto era yo komo el kok
Todos me burlavan
Yose me yamavan
me tomavan al maymun. Yes
Al kuartier las ninyas del dor
me yamavan bovo matador
me yamavan mula
azno kon kakula
porke no tenia yo mamon.
No puedia yo avlar
(muzika dos mezuras)
no savyendo mezmo baylar
No me pueden kalar.

Refren 1

Agora siento
en kada momento
de todas las ninyas I mujeres
Ke ven mi situasyon
Yamarme Pepo
Kon el mizmo puerpo
Solo los dolares trokaron mi pozisyon.

Kuple 2

I despues ke de Nevyork torni
Ekonomizi lo ke gani
Yo pasi fortunas
pan kon azeitunas
Esto era mi komer
Yes
Kuando arivi a Salonik
Trokado kolor otro vernik
aniyos de fula
I yaka de kula
Leguentina, yeno el kiemer
yo me veo estimar
(muzika dos kuartos)
«Mister Jos » me siento yamar.

Refren 2

Ven mi aspekto
Mi ayre gaviento
Los insultos i las burlas
Veo se trokaron por faltar
Yo ya entiendo
En sus ojos meldo
Ke de mis dolares eyas keren profitar.

Kuple 3
I oy ke de pozision troki
las mujeres ijas de aki
Me bushkan me kachan
enteras se anchan
Kuando avlo en inglez
Yes
Kuando ay en chentro reunion
Dizen: «Jos, ke de su opinion»
Siempre kandidato
Para komitato
En mi avla topan la noblez.
Yo devini popular
(muzika dos kuartos)
Oy de todos me puedo burlar
esto aze el dolar.

Refren 3

Senior Jozepo,
«Jos» o «Musiu Pepo»,
Estos nombres sienten kada dia.
Yamarme de el korredor.
Kieren kazarme,
Para aprezarme
Ma yo kontinuo a ser un buen bividor.

La profesora Rivka Havassy de Israel (Univ. Bar Ilan) ke es espesialista en kantigas sefaradis de Gresia, mando este teksto kompleto para LK.  Eya mos aze saver ke es Moshe Kazes i Sadik Gershon (konosidos komo «Sadik i Gazos») ke endjuntos kompozaron la kantika, i la publikaron en Salonik en 1929, i ke de ayi, la djente  empesaron a kantarla.

Rachel Amado Bortinick
Ladinokomunita