eSefarad Noticias del Mundo Sefaradi
El Dia Evropeo de kultura Djudia se establesio en 1996 en Fransia, i en 1999 se izo enternasional.
Oganyo el dia es el 6 Septembre, partisipan 30 paizes, entre eyos la Turkiya,kon programes en Estambol.
El tema de oganyo es «Las fiestas djudias i tradisiones.»
En Estambol va aver konseres, ekspozisiones, konferensias, i mezmo una reprezentasion de la seremoniya de «Berit Mila» en el kal de Neve Shalom, ande el anyo pasado se reprezento una boda.
Los konseres van a prezentar las variedades de muzika djudia de Turkiya,de muzika liturjika asta Klezmer, i siguro muzika sefaradi.
Va partisipar aki mezmo el koro djudio de la komunidad de Salonik. Tambien un konser de muzika klasika ke tiene influensa de la muzika djudia.
La ekspoziison de arte esta muy enteresante,porke por primera ves se va mostrar reprezentasiones de las 54 partidas (perashas) de la Tora, echos por los pintores Istanbullis.
(Se izo tambien un livro de estos, ke va salir a vendida.)
Tambien la skulptora Nadya Arditi va amostrar su arte, se va egzibir koleksiones de Hanukiyot, de monedas de las sinagogas i de egzemplares de las imprimerias djudias en el Imperio Otomano.
Siguro esto todo es avierto al publiko turko. Es parte de los esforsos de la komunidad de Turkiya de darse a konoser al ancho publiko.
Aparte de esto todo, a la okazion ke este dia viene en el mez de Ramazan (Ramadan), la komunidad djudia esta aregalando un pranso (banketo) de «Iftar»(de kortar ayuno) en el salon de boda (evlenme dairesi) de Beyoglu.
Rachel Amado Bortnick trezladó esta enformasion del sitio de la komunidad djudia de Turkia, ke esta en turko http://www.turkyahudileri.com
