eSefarad Noticias del Mundo Sefaradi
Keridos amigos i amigas.
En el Jewish News de esta semana Yossi Aron mos avla de «TU B’SHVAT» HAG HA ILANOT’. Los ke resivieron unas de las primeras edukasiones Judias en los anyos 1940 i 1950 en la Australia deven akodrarsen de sus profesores Sionistos ke avlavan de Tu B’shvat komo si era una de las mas signifikantes fiestas del anyo. Mos davan una idea sovre el Kibutz i la ekonomia del pais, sovre todo en lo ke se trata de las naranjas/portokales. Endjuntos kon estos Madrihim plantavamos arvoles en la eskola i afuera de la sinagoga. Son pokos ke sovrebivieron.
TU BISHVAT, ARVOLES DEL ANYO MUEVO
El MIDRASH en ROSH ASHANA avla de 4 anyos ke kada uno tiene su signifikasion del punto de vista de la Halaha. Siendo invierno al norte de la planeta los arvoles se topan desnudos i ay poko ke se rekolta en el suelo. El siklo konta muncho en la Halaha. La fruta ke se topa en el arvole a la fin del enverano apartiene a la misma temporada. El medio del invierno es el punto de demarkasion del kresimiento en la temporada. Asi las frutas ke salen antes Tu BiShvat apartienen a una otra temporada en komparando kon lo ke krese despues. Todo esto tenia ke azer kon la ekonomia agrikola ansiana i la djente bivia de la tierra. En tiempo del Templo la vida Judia era ekstraordinaria i ansi la primera kodifikasion de la tradison oral es ZERAIM/Granos.
Mas tadre kuando los Judios eran fermeros se toparon biviendo afuera de Israel. La mayoria de estas leyes no entravan mas en kestion. El Shulhan Aruh i el Tur no tomo esto en konsiderasion. Ansi Tu BiShvat perdio su signifikasion. Fue en los ultimos tiempos kon el retorno a la Tierra del Puevlo de Israel ke se metieron de muevo a estudiar estas leyes.
Ma kuando uvo un deklino en la Halaha fue el MINHAG/Kostumbre ke tomo su lugar. Porke no avian tantas leyes se konsentraron en las 7 frutas komo bendision. Ensima de las orasiones ke se azian en un ambiente alegre salio la kostumbre de komer 15 o mismo 30 tipos de frutas. Tenia ke ser las frutas ke kresian en muestro pais. Por esta razon mismo oy se puede tomar frutas sekas. Por sierto en Evropa en un tiempo ke el refrijerator no se topava, merkavan las frutas de Israel Segun la tradision, ay ke tomar el ETROG,ke keda de la Suka.
Los Sefaradim i Hasidim tienen seremonias ke se akompanyan kon las frutas, echas de manera ke mostran Muestra Tierra Biblika kon sus produktos. Aki en la Australia estamos en medio del enverano. Ay muchis-simas frutas. Egziste una teknolojia de preservasion i la fasilidad de un transporte global. Se ven menos aki las diferensias entre las temporadas. Tengo ke dizir ke esto era el kavzo mismo 60 anyos antes. Me akodro de los sovrebivientes del Olokosto kuando se abasharon aki en Tu BiShvat. Tuvieron una sorpreza grande de ver un plato de tantas variedades de frutas. En Evropa no las verian mismo en sus suenyos. Mismo despues de la gerra.
Vos rekomendo de gozar de frutas noche de Mierkoles/Jueves i pensar en mismo tiempo a la signifikasion de muestra tierra bendizida kon sus produktos.
SHABAT SHALOM.
Tradusido por Shimon Geron. Sydney
Fuente: Ladinokomunita
