eSefarad Noticias del Mundo Sefaradi
Siendo ke el BULTEN ke mos metiya al koryente durante mas de 13 anyos de lo ke se pasava en la komunidad de los turkanos en Israel, no eegziste mas, pensi ke vos puedia enteresar la ermoza tadrada de estudyo ke tuvo lugar ayer (25.6.18) en la Universidad Bar Ilan.
Organizada por el Instituto Salti para la Investigasyon del Ladino, la tadrada fue avierta por la moderatora Dr. Suzi Gross, siguida por los auguros de la Dr. Revital Refael-Viviente i Dr. Selim Salti, fundador de la Fundasyon Salti.
Dr. Salti ekspreso su plazer de ver ke su dezeyo de avansar el Sentro Salti en un instituto se realizo i esta fiestando su primer kumpleanyo. Dr. Salti kontinuo i disho: «Todos los objektivos programados se realizaron grasyas al Direkor del Instituto Prof. Shmuel Refael i su ekipa dinamika. Durante este anyo, 2 muevas doktoras se adjuntaron a los 12 doktores alumnnos del instituto. En serka empesaran los aparejos para el 20en Kongreso Internasyonal del Ladino ke tendra lugar en muestra universidad.» Dr. Salti rengrasyo a Perla Nasi i Moshe Shaul ke donaron endjuntos kaji 700 livros ke serviran a azer investigasyones akademikas.
Dr. Dov Hakohen prezento kon projeksion, un ekselente lavoro sovre el kontenido de la biblioteka del Instituto. Esta biblioteka kontiene a parte sienes de livros, koleksiones de kartas, letras, kalendaryos, ketubas i jurnales publikados disde el siglo 18, sea en los Balkanes o en Turkiya . Dr. Hakohen rengrasyo tambien a Moshe Shaul por la donasyon de sus livros, a Perla Nasi por la donasyon de los livros de su defundo espozo Dr. Gad Nasi, a la famiya del jurnalista Nisim Danon z’l por una koleksion de jurnales i a Boaz Menahem por una koleksion de kartas muy raras eskritas en Ladino.
Dr. Rivka Havasy prezento tambien kon projeksion, su lavoro ke eya intitulo «De la musandara a la Biblioteka» mostrando ke detras kada donasyon ay una istorya. Eya mostro exemplos de letras viejas i kantikas de Haim Hazan z»l eskritas en 1933 en Saloniki.
Antes de pasar a la segunda partida de la tadrada, Prof. Shmuel Refael remetyo Sertifikatos de Apresyasyon a Perla Nasi, Moshe Shaul, Boaz Menahem i a la reprezentante de la famiya Danon.
En la segunda partida apartada a los 2 livros muevamente publikados por Dr. Nivi Gomel i Prof. Shmuel Refael sovre el ensenyamiento del Ladino, Prof. Tamar Alexander, Prezidente de la Autoridad de Ladino tomo la palavra i insistio sovre la importansia de la gramatika ke todos los ladino-avlantes nesesitan.
Dr. Keren Duvnov de la Akademia de la lingua Ebrea, mos konto komo eya se ambezo el Ladino i el avantaje de eskrivirlo kon letras latinas. Eya alavo el muevo livro komo un livro klaro, simple, fasil a meldar i ke kontiene mismo un poko de sionizmo.
Dr. Nivi Gomel konto toda la prosedura de esta publikasyon i rengrasyo a todos los ke la ayudaron a realizar esta ovra, sovre todo por el grande apoyo del Prof. Shmuel Refael.
Esta ermoza tadrada se termino kon las palavras de Prof. Refael ke mos dyo el mujde ke el segundo livro esta en preparasyopn.
Nesim Guvenish
Israel
