eSefarad Noticias del Mundo Sefaradi
Tuvimos 2 evenimientos muy importante en estos diyas.
El Alhad pasado, el 12 de Febrero, fue muestra ‘Vijita de Alhad’ onde Elias Barrocas mos presento un filmo ‘My Sweet Canary’, la istoria de Roza Eskenazi, su vida, su reushita komo kantadera de Rebetiko en Gresia en los anyos 20’s, 30’s i mas i mas.
Era mas de 90 minutos de entrevistas kon djente ke la konisieron a eya, i muchos fotos i rekordos de sus kantes, i mas i mas.
Despues de la presentasion, tomimos kafe i dulsurias i echimos lashon, ets. Vinieron mas de 100 personas!
Tambien tuvimos la onor de vijita de reprentasion de miembros de la legasion Turkia aki en Florida, onde mos avlaron por el ‘Turkish Festival’ ke va estar en Ft. Lauderdale al ‘weekend’ de Februar 18-19…. Esta vijita fue por los esforsos de Elias Barrocas, ke konosio a la delegasion Turka en Miami.
El 14 de febrero, tuvimos la onor de una vijita i entrevista de Eliezar Papo de Israel, ke mos vino a vijitar, komer endjuntos, i despues mos dyo la onor de avlar i kontar konsejikas de ‘Djoha’ por mas de doz oras!
Fue un grande plazer enkontrarlo, sintirlo avlar un Ladino yeno de djestos ke me yevo a mi chikez….los djestos de mi famiya!
Es una persona muy amable, i mos sintimos komo mos konesimos de mucho tiempo! El Dio ke le de salud i vidas para kontinuar su lavor, sus eskritos, i todo lo ke aze para la kontinuasion de muestra erensiya i tradisiones…lingua,ets..
Fue una vijita ke se komplo en unos kuantos dias kon la kapachida de muestra presidente, Rose Papo Allen, vinieron mas de 60 personas i avia un pranso en primero de las kumidas muestras. Las mezas metidas kon flores, kon bandieras Israeli, i todo se izo ekstraordinario!… sin mucho tiempo para preparar!
Los elevos de la klasa ‘Viva Ladino’ le eskrivio unas letras de ‘bienvenido’, kantimos muestra kantika de ‘Echar Lashon’, i fue un enkontro muy alegre i maraviozo! Vino komo representativo de la Universida de Ben Gurion, en Israel i mos dieron paketos kon informasiones de los proyektos de la Universida, ets.
Por la kestion de kuantos Ladino avlantes ay en los Estados Unidos, muestra estimasion de los ke son de muestra organizasion es ke ay a lo menos 70 Ladino avlantes aki en la komunida muestra. Eliezar Papo disho ke por seguro ke ay mas de 100 Ladino avlantes en la sivda de Miami, onde el se presento este week-end pasado. Ansina, kero sentir de las komunidades de New York, Seattle, Wash., Washington, D.C., Atlanta, Ga., i Los Angeles…
Daisy Newell
Florida
Para Ladinokomunit
