Selihot , selihot….Djudios al Kal! en La Habana de mi chikes. por Elias Barrocas

Era uzo de los sefaradis de al tiempo de semanas antes de emprensipiar el mes de Elul, los ke eran yamados a la meldadura del Sefer Tora , en lo ke el hazan le echaba la bindision de sentir Misheberaj avotenu ….ke dona 100 pesos para el desayuno de silihot (selihot). Era una mitzva de azer selihot I desayuno en el kal.

En la Habana, la sivdad ande nasi i me engrandesi una grande kantidad de los sefaradis moravan en la “Habana vieja”, la parte mas antika de la sivdad ke esta al lado del porto.Aya moravan endjuntos djudios turkanos kon espanyoles, chinesos, kon kubanos de todas las kolores blankos, pretos i mezklados. Era una sivdad kosmopolita en ke los mas se konosiyan unos a otros i no se podiya kaminar mucho a la kayes sin toparse kon dalgun “payisano”.

Kuba fue, el payis ke mas turkanos aresivio despues de los Estados Unidos en empensipiando el sikolo XX.

El distino de la estorya es ke los djudios turkanos izieron su kal en la kaleja membrada Inkisidor, por kavza ke en esta kaleja moraba el komisariyo de la Enkisiyon de Cartagena de Indias, al tiempo ke la ysla fue kolonya de la Espanya. Este kal , ke primero se membro Sosieta Ebreya Shevet Ahim se izo en 1914 i dunke chiko era komo el Bet Hamikdash de los sefaradism, ke aviyan arivado a Kuba, ma esta es otra larga estoriya.
Despues ke kumpli minyam (bar mitzva) me iva los diyas de alhad , lunes i djueves a selihot al kal ke era sinko puntos de ande yo morava. Era a la sinko de la madrugada i kuando me iva kaminando sentiya el freskor i el roziyo de la nochada kon el guesmo ke viniya de la mar . Las kayes eran vasiyas fina ke arivaba al kal. Suviya la alta eskalera al kal i moz asentavamos a un salon fina ke viniya el sanmas i diziya – Ayde buenos djudios a selihot, A selihot. Djudios al kaaaaal!!!!!!.Este uzo moz vino de las maales sefaradis de la Turkia ande los sanmases se iva por las kalejas a despertar a los orasionantes para orasionar las selihot.

El hazan Salamon Susi , de bendicha memorya se asetava en su sya al lado de la teva i emprensipiava kon una voz basha el Yashem al Teradam de Yehuda Halevi .
Asigun se le kaentava el garon empresipiaba kon el kante Ben adaaaaaaam , ma lejaaaa nirdam kum ukera el eloheja (ombre, de ke durmes, alevantate i orasiona a tu Dio). Las kantes de selihot tienen kada uno i uno su melodiya o makam kada una mas ermoza ke la otra i los orasionantes las sabiyan todas.Dalgunas kada uno ke teniya una buena voz meldava un pasuk.En esto se apresiaba la boz ermosa de Sinyor Davis Barani z”l ke aviya sido kantador de los maftirim en Estambol.La parte sentral de las selihot es el kante “Im Afes” (ke es por el sakrifisio de Yitzjak Avinu), i ande los kantadores perkuravan de dar lo mijor de sus vozes ke yenavan el kal ainda en la eskuridad i la kayades de las kayes de La Vieja Habana. En veses el hazan la kantava kon ermoza voz en ladino:

Si el servisyo de los sakrifisyos fue abandonado
Si muestro santuaryo fue aruinado”’,
El pueblo de Israel nunka sera esterminado”.
Por amor del patriarka Abraham el venerado”.

Avagar, avagar el selijot turava dos oras fina ke el hazan me yamava a la teva antes de dizir el Kadish, en medio del ke yo tanyia las diez kolot del shofar , (unos puntos mankos del amanaser) despues la terua gedola. El shofar muestro (de los sefaradis de la Turkiya) ya no se topa mas, es un shokar kurto i muy refinado kon una bokadura mas grande ke los de oy diya, y el ke dainda tiene uno de estos es komo tener un tresoro. Su boz es muy aguda i alta ke aze estremaser al ke lo siente.

Al kavo, el pueblo kantava Shomer Israel kon mucha alegriya de orasionar al Dio i aver sintido selihot i kada uno le disiy a al hazan Hazak uBaruj, (fuerte i bindicho) i moz ivamos ahuera a bever un kaviko.

Viniya otra una vez el Sanmas i diziya- “Djudios al kal, es ora de tefila”.

Despues de eskapar la tefila, I de la meldadura de la Ley en lunes i djueves, la tradision era el desayuno de seljot, Las buenas mujeres sehuteras aparejavan borekitas de patata kon kezo, asetunas pretas, panesikos, kashkaval , i guevos haminados, ama una kosa no podiya mankar, era el alavado karpuz (sandia), es un gusto ke mos vino de la Turkiya de komer estos salados kon el dulse i kolorado karpuz. Kantes i traisiones trayidas de la leshana Turkiya de tantas sivdades.Se akodraryan i eyos de sus kales i de selihodes ke asiyan en sus sivdades antes de emigrar a la Amerika?.

En las kayes se saludavan los djudios en deseyandosen anyada buena, para muchos anyos i Tisku leshanim rabot (Ke te seyan dados muchos anyos).

Ansi eran los tiempos , sinti muchas i ermozas selihot, ama no komo akeyas de La Habana….

Shana Tova Umetuka!.
Elias Barrocas