eSefarad Noticias del Mundo Sefaradi
El numero 65 de Erensia Sefardi salio kon 12 fotografyas i los artikolos i rubrikas siguentes:
– 1740 – Invitasyon al Renyado de Napoles.
– Personages istorikos Sefardis, Jacob Rodrigues Pereire, 1715-1780.
– Folklore i tradisyones, las kantigas de mi nona.
– El Mundo Sefardi, 1) el Boletin Ke Haber de la Fundasyon Istorika de los Djudios de Rodes, 2) Sellos de Turkiya sobre dos justos de la umanidad: Necdet Kent i Selahattin Ulkumen.
Editorial:
«Desde 1492 los Sefardis tuvyeron ke salir de sus payises para salvar sus vidas i su relijyon. Ke seiga d’Egitto kuando Nasser tomo el poder, del Maroko del Norte kuando los Espanyoles se fueron atras, de la Evropa okupada por Hitler i su aleados, del Portugal despues de la Inkizisyon, i de la Espanya de Torquemada.
Agora la vida de los muestros en Venezuela i en Turkiya se esta azyendo muy perikoloza. Las atakes en muestro Kal en Karakas por las fuersas de un governo ke esta sovre la dominasyon de los terroristas Iranis i Arabes i ke
tyenen una filosofiya Nazista, no augura byen para los muestros.
En Turkiya, un payis onde los muestros bivyeron mas de kinyentos anyos, la direksyon del governo esta aserkando mas i mas a los ekstremistos Islamikos, i la situasyon para los Sefardis esta peor.
En konsiderando lo ke paso i lo ke esta akontesyendo agora, mozotros kreyemos ke muestros keridos ermanos i ermanas deven de pensar byen la posibilidad ke ya vino el tyempo para topar otro lugar i trokar el ayre.»
Dr. Albert de Vidas
Editor, Erensia Sefardi
erensia@aol.com
