eSefarad Noticias del Mundo Sefaradi
Keridos amigos i amigas
El Jewish News tenia un articklo sovre «Kirk Douglas» ke kumplio sus 100 anios en 2016. Este artikulo fue presentado por «Tum Tugend» i nos konta la istoria de el i de su mujer desde 63 anios. [El primer filmo ke vide de Kirk Douglas era en el Kibbutz entre 1951 i 1953. Puedia ser «The Juggler»]
Saludes a todos
——————————————————————————-
REKUERDOS DE UNA VIDA ENTERA EN HOLLYWOOD
LA ISTORIA DE «KIRK DOUGLAS»
Oy tiene 100 anios i su mujer tiene 98 anios. Avlan de manera muy franka del kasamiento ke tuvieron durante 63 anios.
Kuando Kirk Doulas se kaso kon «Anne Buydens» en Las Vegas, eya venia de yegar a los Estados Unidos de la Europa. En el tiempo Kirk era un aktor guapo i muskular kon la reputasión de ser un Don Juan korriendo detrás de las mujeres. Después de 4 anios en 1958 estava aziendo un filmo i eskriviendo de leshos a su mujer. Una frase interesante era «Si bivo asta los 100, kedaran dainda kosas ke no seran dichas». Al fin tuvo la suerte de selebrar sus 100 anios en 9 Disiembre 2016. Metio de nuevo una nota diziendo «Mismo en teniendo 100 anios lo ke dishe antes es justo dainda «.Todo este kambio de letras se topa en su livro nuevo «Kirk and Anne, Letters of Love, Laughter and A lifetime in Hollywood» eskrito por «Marcia Newberger». En soma Kirk publiko 12 livros i Anne solamente uno. El ultimo livro kontiene dekadas de sorrespondencia tratando de los tiempos tempestuosos i de las relasiones entre 2 personalidades fuertes.
Era el ijo de un imigrante Judio Ruso ke vendia vestidos i artíkulos viejos i eya era la ija de una famiya Alemana prospera. Anne disho en una entrevista ke kuando bivía en Europa sonyava de irse un día a los Estados Unidos. Un país ke tenia todo. Kuando le demandaron a Anne si avia yegado a su ideal, Kirk tomo la palavra diziendo «Por sierto. Se kaso kon un aktor muy riko». A través su kariera larga Kirk jugo en 90 filmes i durante 63 anios de kasamiento se topo leshos de la kasa, embiendo letras i fotos a su mujer. Su ultimo livro de 221 pajinas kontiene a estas letras i fotos. Nos da una idea de sus amores i de sus infidelidades. Ma este aspekto forma una parte chika del livro. Tuvieron amistades kon muchos presidentes desde John F, Kennedy asta Ronald Reagan i Obama. Se asentaron kon los rikos i djente selebre de Los Angeles. Anne adresava sus letras a «Isidore o Izzy». En kada entrada en este livro avia una istoria.
El padre de Kirk se yamava «Hershell Danielovitch» i kuando vino a New York de la Rusia, troko su nombre a «Harry Demsky». Su ijo al entrar en la Universidad de St. Lawrence en el Estado de New York se rejistro komo «Isidore Demsky». Sus amigos lo yamavan «Izzy». La famiya de Anne partieron de Alemania kuando los Nazistos entraron en poder, instalandosen en Bruselas. Una ves de mas kuando los Alemanes entraron en Bélgica, la famiya kon la ayuda de un amigo «Albert» sefhuyeron en karro a Fransia. Anne se kaso kon el para ganar la sivdadania Bélgica. Avlava muchas lenguas i lavorava en la industria de filmes.
Del otro lado kuando Kirk se divorzo de su primera mujer, la artista «Dianne Dillel » vino a Paris en 1953 para jugar en el filmo «Act Of Love».. Kuando se enkontró kon Anne, estava fianzado a la artista Italiana «Pier Angeli». Malgrado esto invito a Anne a una sena en un restaurante. Eya lo refuso unas kuantas vezes i por esta razón la yamo «Stolz/orgullio o kavesa dura.
«En 2003 después de 49 anios de kasamiento Anne se desidió de konvertirse al Judaismo. Se fue a ver al Rabino «David Wolpe» del Templo Sinai i en una entrevista avlo de su experiensia en la Mikva. Entro en una pisina metiendo la kavesa debasho la agua i al salir estava mojada komo un perro. Ma ya era Judia. Kirk developo kon el tiempo su definisión del Judaismo. Disho ke se engrandesió aziendo sus orasiones kada manyana i metiendo los Tefillin. Despues abandono el aspekto formal de la relijion. Kreia en Dio i era feliz de ser un Judio. Pensava ke darse demasiado a la relijion no ayudava a la sivilizasión. Amar a los otros era su relijion. Así marido i mujer entraron en aksión dando 120 millones de Dólares a la karidad en Israel i Amerika. Komo chiko Kirk avia konosido el Antisemitismo. No le davan empiego porke era Judio. Komo artista enkontró un prejudisio en los anios 1950 i 1960. Formo su kompanyía de produksion yamándola «Byrna» en onor de su madre. Kuando le amostrava a su madre los filmes ke azia, ella le dezía «Amerika es un país extraordinario».
————–
Avlando de Einstein, el nasio en Ulm en 1879. En 1895 se fue a Suiza para ambezar i ensenyar. En 1905 resivio su PAD i publiko La Teoría de Relatividad. En 1921 resivio el Premio de Nobel. En 1933 se fue a Los Estados Unidos i se kedo ayí. En 1955 murió de un atako de korasón en New Jersey.
Trezladado por Simon Geron
Sydney
Fuente: Ladinokomunita
