eSefarad Noticias del Mundo Sefaradi
Mi madre, Rachel Cohen, tresera ija del primer kazamiento de mi nono Sabetay Cohen, nasio en Estanbol. (Siempre se glorifikava ke aviya venido de la «Evropa».) Eya no saviya egzaktamente kuando nasio, solo ke era en 1905 i en Purim. Mos desho la buena vida en 1991. (El Dio ke tenga su alma en Ganeden.)
En metiendola al mundo, su mama Rachel Saporta se murio. Mi nono se kazo kon Sara, kon ken tuvo su ijo uniko. Eran anyos muy duros para el mundo, antes de la Primera Gerra Mundial.
Mi nono Sabetay i mi tiya Bohora vinieron a la Argentina para entornarsen una puerta para «la Amerika». Sara, la madrasta de mi mama, se kedo sola en Estanbol, kon su ijiko i las dos ijas de mi nono, mi mama i mi tiya.
Lavoró komo mosa en las kazas para mantener a las tres kreaturas, vendio sus mobles i todos sus bienes, i los miro todos, sin apartar su ijo i sus ijastras. La temperatura en el invierno en Turkiya era muy yelado, tuvieron muncho friyo i ambre i munchas nesesidades -kontava mi mama, ma preferava no akodrarse de estos momentos muy duros de su vida.
Solo a su madrasta Sara, le teniya un amor sin limito, por todo lo ke izo esta santa mujer (sola en Estanbol) sin distinksion, por su ijo i sus ijastras. (La grande ya estava en la Argentina kon mi nono.)
Sara se murio en Estanbol, i los tres ijos vinieron a la Argentina, posivlemente en 1919 o 1920.
Mi mama, Rachel, teniya la pronunsiasion i la terminolojiya del djudeo-espanyol. Uzava munchas palavras del ladino, munchas dichas i frazas, ma si mozotros, los ijos, keriyamos avlar en djudio (ladino), se arraviava por ke le paresiya ke mos estavamos burlando de eya.
Dichas ke mi mama empleava sin falta:
- «De muerte ke no manke», kuando alguno estava absente.
- Si le pruntavamos, «Ande te vas, mama, ke te vestites
tan linda?», respondiya «A la Kuzina de Palti». - «Sinyor del Mundo»
- «Guay di mi»
- «Mashalla» kuando algun ajeno alavava a sus ijos o inietos (para aleshar el ojo malo?)
- «En buen asemejado» kuando se merkava lo estranyo kon alguno de sus keridos.
- «Guadrado del ojo malo i aynaras (nazar)».
- «Esto enfasiada»
- «Barminam» etc.
Delantre del ogar era mi madre, ke este en Ganeden, ke se kargava de todos los aparejos para las fiestas, para Mued, para Shabat, para un Meldado «Ke el Dio ke mos guadre».
Para Shabat, «No se toka fuego en Shabat». El viernes a mediodiya, ya aviya aparejado todas las komidas ke se ivan a konsumir al viernes, al shabat i a la noche de alhad: Borekitas, boyos i bulemas de kezo, handrajos (sin falta), guevos haminados; pan espondjado, biskochos de alkol, borekitas de muez, etc.
Kuando teniyamos «vijitas», se serviya kafe «a la turka». Siempre era akompanyado de una dulsuria (de bimbriyo, de damasko, de durazno (melokoton /shefteli), i / o sharope.
Nunka, NUNKA, el kafe se puediya konsumir sin, a lo manko, una kucharika de asukar. Por ke el kafe sin komer dulse, i el guevo haminado sin sal, «Oras buenas ke tengamos», eran para el Avel (7 diyas de dolio).
Mi padre nasio en Halep (Siria). Su alkunya era Sarda. Ma despues, todos lo trokaron por el de Levy (Haim Levy), nunka supimos por ke razon.
En la Siria, su padre era shohet, matarife (kasap / karnesero) ritual. Eran 10 ermanos. (Yo konosi en Tel Aviv, a mi tiyo Moshe, a ken mi padre no konosio). Me konto ke aviyan ghettos, ambre i persekusiones relijiozas. Por esta razon, mi padre viajo a la Amerika, a los 14 anyos, kon un vizino!…
Para eyos, Amerika era USA, ande se lavorava i se ganava bueno. Ma la entrada en USA era limitada, i devieron abashar kon el vapor fin a Buenos Aires, kapital de la Republika Argentina.
Ayi, mi padre bivio en un inkilinato (pansion de nivel muy basho), i lavoró komo vendedor ambulente, ayudando al visino de Aleppo kon ken aviya viajado.
Por las noches, estudiava el espanyol. (En la Siria, avlavan solo el Arabo). Lo aziya sufrir muncho de avlar de rekuerdos de su chikez. Es de mi mama ke konosimos algunos fragmentos de akeyos tiempos. El manteniya la korrespondensia kon Aleppo, ke se kortó durante la Segunda Gerra Mundial.
Mi madre siempre mos diziya ke en el meoyo de mi padre estava, azer paras buenas i retornar a la Siria, kon toda la mishpaha. Ma kon tres ijos, la kriza ekonomika de los anyos 30, mas la Sigunda Gerra Mundial, nunka se le fado.
Serka de 1962, mos parvino una letra de su madre, mi nona Bulisa Imal, ande le diziya ke estava kontente de saver ke bive kon bueno en la Argentina, i ke mi nono Mordehay aviya deshado la buena vida unos anyos antes.
Nunka tuvimos fotos de eyos. Los djudios ortodokses ansianos, por razones relijiozas, nunka se fotografiyan.
Komo mi mama, el tambien no saviya egzaktamente kuando nasio. Pensamos ke era en 1894 o 1896, i el mos desho en 1968, ke el Dio lo tenga en Ganeden.
Mi padre lavoró toda su vida en el negosio de ropas. Era muy lavoriozo, ekonomiozo, i muy espantozo de kayer en defekto kon la ley. Bivio i sufrio todos los efektos de la Kriza de 30, de ke la Argentina, este ermozo payis, resivio, i dainda resive, tantos chaketones!
Trezladado al ladino por Güler Orgun
*Alberto Levy es Dr.en Ciencias Económicas.-Ex-Vocal del Tribunal de Cuentas, y ex-docente de la Facultad de Ciencias Económicas de la Universidad Nacional del Nordeste,ahora retirado de ambos cargos. Tiene 8 nietos, 3 correntinos, 3 sabras y 2 andaluces en Málaga.
