Rekodros del Buenos Ayres Sefaradí por Esther Cohen de Cohen

Yo nasí en el antiko kuartier de San Telmo, en la sivdad de Buenos Ayres, serka de la istórika «Plaza de Mayo», lugar de echas muy emportantes para la istoria arjentina.

Sirka del porto de Buenos Ayres, ande se asentavan los inmigrantes ke yegaban de paizes i tierras leshanas. Entre eyos se topavan mis antepasados, nonas i nonos, padres i tiyos, ke abashaban de los barkos ke vinían, en el kazo de los sefaradíes, en la más parte del entonses Imperio Otomano. Algunos de la leshana Turkía, de sivdades komo Izmir, Istambul, Aydín i otras.

Desde la final del sieklo XIX, munchos ke vinían de Maroko, Afrika del Norte, se avían asentado en este kuartier i fraguaron la muy ermoza sinagoga de la kaye Piedras
1164, ke se yama Bet-El.  Adientro es una djoya arkitektónika.

Uno de sus Rabis era de alkunya Moisés Benlolo. Él avia arrivado de Brasil, komo munchos otros, ande lavoraba  en la industria del kaucho. Kuando vino la krisa ekonómika kon el kaucho, munchos emigrarom a la Arjentina. Eran marrokanos.

Bivía en la kaye Piedras kon muncha umildá entre las kayes Garay i Brasil, serka del kal Bet-El. Era el abuelo de Viktoria Benlolo, mujer de uno de mis primos ermanos, David Cohen. Uno de sus ayudantes tenía el nombre de Nahmías.
 
Mi marido, Moisés Cohen, izo su Bar-Mitzvá kon el Jajam Benlolo, eran del mismo kuartier. Su padre, Menajem Cohen, avía arrivado a Buenos Ayres desde Izmir, el 1º de Enero de 1924.

Dospues de vender artikolos de bazar i de lavorar en un puesto del merkado «Proveedor del Sur «, se asentó kon su propio magazin sobre la kaye Defensa 1245.

Esta kaye se tornó en el lugar de asentamiento de munchos merkadores sefaradíes i ashkenazíes. Era muy komersial.

Munchos magazines de la kaye Defensa serravan sus puertas los días de fiestas muestras. La kaye se kedaba kon muy poko movimiento, i los vizinos ya lo savían i mos respetaban. Era una époka de buenas relasiones entre djudíos, kristianos i musulmanes.

Una chika  vista de las alkurnias mos da idea de la emportansia ke tinían los djudios en el komersio del kuartier de San Telmo.

Por enshemplo: Sereno, Bonomo, Galante, Itsjaki, Noé, Cohen, Dayan, Sanane, Abrevaya, Azar, Catán, Salmún, Spolianski, Guitelman, Matles, Alalouf, Benlolo, Silicaro, Taboj, Benyacar, Sazbón, Romano, Gomel.

Esto es parte de la istoria del Buenos Ayres sefaradí.