PURIM DE LOS SARAGOSTIS por Selim Amado

En mis anios de estudio en Istanbul bivia onde una famiya Djudia orijinaria de Izmir, la Famiya Samuel ( o Shemuel). Un dia del 17 de Shevat ( en el mes de Febrero), me dizen de vinir mas demprano a la tadre, porke es noche de “Purim de los Saragostis” , I ke se va meldar la “Megila”.   Yo savia ke purim era mas tadre, no entendi de kualo se esta avlando.  Demandi.  Me fue eksplikado ke   los Saragostis orijinarios de la Sivdad de Saragossa de antes de la ekspulsion,  kontinuan a fiestar un milagro ke les fue echo en esta sivdad en meldando  una megila especial ke se transmite asta oy de jenerasion en jenerasyon.

En estos dias kero nombrar a esta famiya de Samuel, ke oy tambien konserva la megila I uza meldarla entre famiya, segyida de un pranso familial.  Los rengrasio de averme dado el material para ser prezentado en este artikolo.

El fakto – o la lejenda- es ansi :

En  la kapitala Saragossa del  reyno de Aragon,  bivian trankilmente Djudios basho un rey poderozo.  Este rey uzava fiestar okaziones espesialas en pasando sovre su kavayo por las kalejas de la sivdad, I tambien por ande bivian Djudios. Afin de mostrar sus respekto I fidelidad al rey de Aragon, los gabayim de la komunidad uzavan a salir al enkuentro del Rey kon su kompaniya   en teniendo en sus manos las kashas ornadas I brodadas de los Sifrei Tora ke los kitavan de las Sinagogas, en deshando los rulos de la ley en la sinagoga para no desekrar la ley santa.

Este uzo le plazia muncho al Rey I por esta razon el tratava ayinda mijor a los Djudios.  Ma en su korte el Rey tenia una persona ke era enenigo de Djudios ke se yamava Marcos, I ke para  entrar en los ojos de su Rey  keria mostrar ke los Djudios no meresen esta  buena fama.

Kuando por hazardo Marcos supo ke los Djudios salian al enkontro del Rey kon kashas de los Sifrei Tora vaziyas,  fue se lo konto al Rey, estando seguro ke esto era la mijor okazion para el  de dezbarasarse de este puevlo. Para kastigarlos, Marcos le dio al Rey  la idea de matar o arondjar del reynado a todos los djudios por ser tan hipokritas en sus repekto al rey.

 “ Si los arondjo o los mato mi pays va sufriyir, porke en fin de kuento eyos son sivdadinos buenos ke pagan munchas taksas, i  todos no son responsavles, ay inosentes, deke ke kastige yo i a los inosentes?”

“Su majestad tiene ke saver ke los Djudios son todos los mizmos, todos azen lo mizmo, i todos son de kastigar por el manko de respekto ke mostaron sus shefes en riyendosen de ti kon las kashas vaziyas de sus livro santo” adjusto Marcos kon una sonriza de burla malisioza.

“Mira Marcos, si lo ke me dizes es verdad, mi ravya sera muy muy grande i tengo ke kastigar a todos los Djudios muy gravemente” disho el Rey. “Ma no kero azer indjustisia porke asta agora eyos fueron loyales a mi. A la proksima ves ke vo pasar por la kaleja de los Djudios I ke eyos me van a resivir kon sus rulos de la ley, tu vas estar en el kavayo al lado de mi. Te vas a abashar I vas avrir sus kashas onde deve de estar los rulos santos . Si estas kashas  kon vestidos brodados estan vaziyas, entonses vas a aplikar tu plano porke eyos ya lo meresen. Ma si lo ke dizes no es verdad, ke sepas ke el mezmo kastigo va ser kontra de ti . Marcos estava tan seguro ke la informasion ke teniya es verdadera,  ke empeso a alegrarse ke el va estar al lado del rey kon su kavayo, i iva azerse segundo al rey en todo.

La noche de antes a la parada del rey kon su kompaniya, al Shamas de la sinagoga mas grande de Saragossa no le entrava esfuenio en el ojo.  Tenia un grande espanto I el presentimiento ke en la vijita del Rey en el kartier de los Djudios un grande perikolo se estava aserkando.  Kijo ir kontar esto a los gabayim del kal.  Ma se espanto ke todos se riyerian de el i no lo kreerian.

Finalmente el shamas se kedo durmiendo, i se sonio ke un viejo de barva blanka  lo despertava en dizyendo : “Alevantate, no piedras tu tiempo. Una grande sakana (perikolo) los espera a los Djudios, korre, va a la sinagoga,  i mete todos los rulos de los Sifrei Tora alyentro de sus kashas i vestidos, i no digas nada a ningunos !” 

No alkanso el Shamas a dizir ni un biervo, la figura del viejo kon barva se desaparesyo. Se desperto en tremblando i koryo en la eskuridad a la sinagoga. Estava seguro ke el ke aparesyo en su esfuenio era Eliyahu Hanavi i ke su esfuenio era un avertisimiento muy seriozo del danio ke espera a los Djudios.

Lo ke este Shamas no savia,  es ke el no era el solo al kual aparesyo Eliahu Hanavi en el esfuenio.  Todos los shamashim de las sinagogas  de Saragossa vieron el mezmo esfuenio, eyos tambien korrieron i metyeron los rulos santos en sus kashas vestidas ke estavan vazias para aleshar el perikolo.

La maniana el sono de trompetas anonsiavan ke el kortej del rey se estava aserkando, i los djudios, kon los gabayim i notavles de la komunidad se preparavan a resivirlos kon los Sifrei Tora  en las manos.  Kuando vino el rey i ke los Djudios se enkorvaron para saludarlo, Marcos ke estava al lado disho : “ Su Majestad  dezea ver kualo ay en estas kashas kon vestidos brodados  ke tenesh en vuestras manos”.

Los Djudios fueron horrifiados de esta demanda ke no se esperava . Kualo ivan azer? Ma ke remedio tenian mas ke azer lo ke diziya el rey. Kon sus korasones apretados i termblando de espanto empesaron a avrir las kashas, i a sus muy grande sorpreza, los rulos sakrados estavan alyentro!  I todos los viyan.

El rey estuvo tambien muy sorprezo.   Markos ke esperava para el una grande viktoria, le kayo la kolor de la kara, se le tomo la avla. El rey  kon toda su ravya grito : “Mintirozo, traidor! kijites el mal de otros, agora tienes ke pagar  por este krimen tuyo de la mezma manera”, i ordeno “enkolgaldo imediatamente”

Marcos resivio ansi su kastigo bien meresido. Kuando a los Djudios, el rey deklaro ke tiene grande konfiensa en sus loyalidad, i en rekompensa ordeno ke todos los Djudios seygan liberados de pagar taksas por los tres anios venidores.

Kuando los Djudios supieron de ke forma eyos fueron salvados de la muerte, sus alegria fue muy grande. Eyos rengrasiaron a sus Dio por averlos salvado i desidieron de observar muncho mas las enkomendansas de la relijion Djudia en el futuro. Eyos tambien desidieron de fiksar el 17 i 18 Shevat komo dias de orasion I de akodramiento de este miraklo, para ke sus ijos I las futures jenerasiones se akodren de este evenimiento mirakolozo ke los salvo de ser destruidos en manos de un enemigo kruel.

I esta es la historia del Purim de Saragossa, ke se paso antes kuaje 600 anios (1421) i ke una de las famiyas desendientes, la Famiya Samuel de Istanbul fiesta oy en dia.

Selim Amado