Programa de radio “Muestra Lingua” de esta semana

 

“Muestra Lingua”,un programa que se emite por Radio  J – 94.8 FM  de Francia, conducido desde hace cuatro años  por el señor Edmond Cohen.

Sale al aire los jueves de 16:00 a 16:30hs y se puede oir en Paris y algunas ciudades cercanas. 

Transcribimos debajo el texto del programa del  jueves 31 de diciembre de 2009:

 

LOS DJUDYOS DE ZANTE

Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.

Syendo ke amanyana vamos a ser el muevo anyo komersyal, komo diziya un primo miyo, aprovecho esta okazyon para embiyarvos por las ondas , las ondas pozitivas, mis mijores dezeos de buena ganansya, i por siguro de salud para aprovechar esta buena ganansya. 

I komo a kada vez, vos akodro ke el proksimo atelye de konversasyon de la asosyasyon Vidas Largas se tendra el djueves ke vyene, 7 de janvier 2010, de las dos a las kuatro i medya-sinko, en el Centre Communautaire, 119 rue Lafayette Paris (10°) métro Gare du Nord o Poissonnière. 

El djueves pasado, empesi la emisyon kuatro minutos mas tadre ke mi ora, por modo de los haberes, sovre todo  este haber sovre la veluntad del papa de azer un santo de Pio XII, el papa ke paso la gerra entera sin nunka kondenar el nazismo, i sin dizir nunka el byervo djudyo. Ya vo venir sovreesta kuestyon, ama agora era solo para eksplikarvos ke no pude eskapar todo lo ke keriya dizirvos en mi emisyon de la semana pasada. Kapara ke sea, vo lo vo dizir oy. 

El djueves pasado vos aviya deshado en 1553, kuando Joseph Nassi, a la yegada de su tiya en Estambol, se aze azer mila i se yama por su nombre djudyo Joseph Nasi. I se kaza kon Reyna, su prima ermana, ija de Gracia. En djuntos van a tener un rolo importante en la politika del Sultan. Joseph tyene djente ke lavora para el en toda la Evropa, i puede dar haberes importantes al Sultan. Ay  peleo entre dos ijos de Suleyman, Selim el bohor i Beyazit el mas chiko. Suleyman prefyere a Beyazit, ke tyene mas gusto para las kozas militares, ama Joseph toma la defensa de Selim el bohor i obtyene de aserkar Suleyman de su ijo Selim, ke de este diya va tener agradesimyento para Joseph. I Suleyman tambyen tyene amistad para Joseph ke supo aserkarlo de su ijo bohor. 

En 1561, fiya a Donya Gracia i a su yerno Joseph la konsesyon de la sivdad de Tiberiade, en el Galil, al bodre del lago de Kineret, i tambyen syete kazalikos al lado. La sivdad es entera de fraguar por de muevo, syendo su estado. Joseph , ayudado por el pasha de Sirya ke aze lavorar los ovreros arabos del vizindaryo, eskapa los lavoros en un anyo. Joseph aze sembrar amoreros (des mûriers) para la industriya de la seda i fraguar fabrikas para azer los teshidos de seda. Aze tambyen vinir lana de Espanya para fabrikar teshidos de lana. 

Embiya una letra sirkular a todas las komunidades djudiyas de Italia para kombidarlos a venir en Tiberiade, i la komunidad de Cori en Campania se aparejo par irse todos en djuntos, ama finalmente esto todo no se izo, kon la opozisyon, ya…, de los arabos de aya, i todas las difikultades tambyen vinyendo de los enemigos de Joseph en Estambol. 

Los Nasi no reusheron de fraguar un estado de Israel, puede ser ke dainda no era el buen tyempo, ama lo ke es siguro es ke tanto la Senyora komo su sovrino i yerno aprovaron de azer arrebivir la tyerra de Israel, afillu si no reusheron. 

Kuando Selim, a la muerte de su padre Suleyman el Magnifiko en 1566, se va azer Sultan kon el nombre de Selim II, para rekompensar a Joseph de su fidelidad, lo aze duke de Naxos i de las syete islas (las Cyclades). Kale entender ke no es solo un titolo. Kyere dizir ke Joseph es el haliz senyor de todas estas Islas tomadas a los Venezyanos por los turkos . Esto dicho, Joseph no se fue en estas Islas, se kedo en su palasyo de Estambol para okuparse de sus echos. 

Joseph, Duke de Naxos,  bivyo asta 1579, 5 anyos despues de la muerte del sultan Selim II, i asta su muerte, komo su tiya i suegra Gracia Nasi, no kedo de okuparse de sus ermanos djudyos, no solo los proves, ama tambyen  de enkorajar i ayudar a los eskrivanos i hahamim. I Reyna su bivda, ke bivyo otros 20 anyos asta 1599, kontinuo su ovra i fraguo una basmaane en su palasyo mismo, para editar livros djudyos. 

Ansina s’eskapa lo ke vos keriya dizir la semana pasada, i ke no tuve tyempo de eskapar. Aprovecho tambyen ke tengo tyempo de azerlo oy para dizirvos ke, para kontarvos la istorya de los Nasi, lavori lo mas sovre un livro eskrito por Richard Ayoun, k’este en ganeden, i el profesor Haïm-Vidal Sephiha, i ke fue puvlikado tan en franses komo en kasteyano, intitulado en franses Sefarades d’hier et d’aujourd’hui 70 portraits, i en kasteyano Los sefardies de ayer y de hoy 71 retratos. Komo penso ke todos vos vaj a demandar kyen es el setenta i  unyemo, afillu si no tyene nada de ver kon muestro echo, vos digo kyen es : Baruch Spinoza, ke esta en kasteyano i no en franses (no porke el herem se kontinua en Fransya, ama solo porke es muy konosido, i ke kuando se eskrivyo en primero el livro en franses, no paresiya menester de avlar de el, i para el livro en espanyol trokaron de idea).  

I agora ayego a la istorya ke pensi de kontarvos oy : una ermoza istorya para eskapar el anyo  (el anyo komersyal…) . Esta istorya mos es kontada en el Jerusalem Post por una mujer israelyana, una gazetera parese, la senyora Leora Goldberg.
Es Rachel Bortnick ke sinyalo este artikolo en Ladinokomunita. 

Esta mujer Leora Goldberg se va por las vakansas en la isla grega de Zakynthos, mas konosida por su antiguo nombre italyano de Zante, isla ke se topa al oeste de la Gresya, mas al sur de Corfu i de Cephalonia. 

Para su viyaje, aze en primero Tel Aviv-Athena, i despues kon otro avyon Athena- Zante. Durante su viaje, melda un livro sovre la isla, su istorya, su jeografiya, ets, ama nada sovre lo ke se va ambezar aya i ke mos esta kontando agora. 

A su yegada en las isla, toma una araba para irse asta su destinasyon, una kaza alkilada a una vyeja kazalina grega vestida entera de preto, i muy orgulyoza de amostrar a esta kaza suya. Les amostra las kamaretas, i por siguro la kozina kon sus ermozos chinis a la grega. 

Leora da a entender a la grega ke por razones relijyozas no va uzar de sus chinis i ke se yevo los suyos desde Israel. I es agora ke todo empeso… 

La grega mira al padre de Leora, vinido kon eya, ve ke tyene  una kipa sovre la kavesa, i les demanda de akompanyarla a la uerta. Komo estavan en altura, les aparese una vista magnifika sovre la mar i las naves. Ama la grega les abolta la espalda i les amostra la otra vanda. «Mirad por aya!» , les dize. Kyere saver lo ke ven. «Arvoles», dizen. «Mirad mijor». El padre de Leora dize : «veo komo unos dyentes blankos, aya leshos». Los mira un tyempo i les dize : «Esto es el semetaryo djudyo». Los dos kedan enkantados. ¿Djudyos aki? Nunka oyeron esto. Dinguno de sus amigos venidos en esta isla les avlaron de djudyos. 

Leora eskrive : «De este momento asta ke me fui de Gresya, las vakansas de enverano a bever uzo en el bodre de mar se izyeron un viaje apasyonante, al kavo del kual deskuvri una istorya inolvidavle». 

La demanyana de despues , Leora se va al semetaryo, topa kon emosyon la estreya de David a la puertizika del semetaryo, entra, i topa un grande semeteryo kon syenes de  tombas  desdel siglo 16 asta 1955. Todo es byen entretenido, i ay pyedrizikas sovre munchas tombas, prova ke an vinido vijitadores aze poko. 

1955. Se mete Leora a pensar. Esto es despues de los nazis. Los ke konosen la istorya de los djudyos de Gresya ya saven lo ke se paso durante la gerra, i la devastasyon de Rhodes, Corfu, Selanik, Athena…Desde 1944 no aviya mas djudyos, mismo en las mas grandes komunitas. ¿Komo se aze ke ay tombas asta 1955? 

Leora se dechida de bushkar mas. Topa el bekchi del semeteryo, bekchi grego komo eran su padre i su papu. Ama no savyendo avlar grego, no se puede dar a entender. Se va a la kaza del Mayor de la sivdad, i aya el ke esta a la akojida le demanda, komo koza muy naturala, si ya se fue al kal. «¿Komo me disho? ¿Un kal en esta isla?» Le da el adreso. Aya, en la kaye al sentro de la sivdad, entre dos hanes, se keda solo una puertizika asemejante a la del semetaryo. Ensima de la puerta, un arko de pyedra kon un livro avyerto. 

Melda : «En este santo lugar se teniya el kal Shalom. Aki, del tyempo del terremoto de 1953, vyejos sefer toras , de antes ke la komunita se estableska aki, se kemaron.» 

A traves de la puerta serrada ve dos estatuas. Vyendo sus largas barbas, se pensa ke son hahamim. Ama lo ke esta eskrito sovre la pared le amostra ke se yerro : «Esta laja en rekodro del agradesimyento de los djudyos de Zakynthos para el Mayor Karrer i el ovispo (yo dire el papasbashi) Chrysostomos.» 

¿De kualo se trata ? ¿Kyen eran estos dos? ¿Deke estas estatuas? ¿Kualo se paso aki? Tyene menester de un indisyo, sino una repuesta. Se abolta a la kaza del Mayor, eksitada i temblando. Topa de muevo el ombre a la akojida, ke la embiya a la tresera tabaka, andel mayor. Le demanda si le puede avlar unos kuantos puntos. El mayor acheta, i medya ora despues, ya se ambezo la koza : 

El 9 de septyembre  1943, el Governador alman yamado Berenz demanda al mayor, Loukas Karrer, la lista de todos los djudyos de la isla. Pishin el mayor se va a ver al papasbashi Chrysostomos, i en djuntos dechidan de refuzar a la demanda. I se van a ver a Berenz para dizirselo. Berenz insista, i Chrysostomos le responde ke si estos djudyos no eran kristyanos, yene biviyan aki en pas i kyetos desde syenes de anyos. I adjusta : «No izyeron danyo a dingunos. Son Gregos komo todos los otros gregos, i serya una pedrita para todos los moradores de la isla si los djudyos deviyan irse.» 

El Governador insista yene ke le den la lista de los nombres. Estonses el papasbashi le da un papel kon solo dos nombres : «Ovispo Chrysostomos i Mayor Karrer.» I ademas, el ovispo eskrive una letra para Hitler el mismo, deklarando ke los djudyos de Zante son basho su otoridad. 

Sin un byervo, el Governador toma los dos dokumentos, i los embiya al Komandador militar nazi in Berlin. Entremyentres, no savyendo lo ke va afitar, los kapos gregos de la isla eskonden kada djudyo en kazas kristyanas en medyo de las montanyas. Ama finalmente, el orden de deportasyon de los djudyos fue anulado por los nazis, i esto grasyas a estos kapos ke rizikaron sus vidas para salvar a sus djudyos. 

En oktovre 1944, los Almanes fuyeron de la Isla, deshando detras 275 djudyos. Toda la povlasyon djudiya se aviya sovresalido, kuando en otras rejyones fueron eksterminadas. 

En 1948, en agradesimyento por el koraje de los gregos de la isla durante la schoa, la komunita djudiya izo dono de vidros de iglesya (des vitraux) para la Iglesya de San Dyonissios. 

En agosto 1953, la isla fue derrokada por un terrivle terremoto, i toda la male djudiya, inkluyendo los dos kales, fue destruida. Poko despues, 38 ultimos  djudyos de la isla se fueron en Athena. Los otros ya se aviyan indo antes, sea en Erets desde 1947, sea en Athena. 

En 1978, Yad Vashem onoro el ovispo Chrysostomos komo el mayor Karrer kon el titolo de Djustos entre las Nasyones. 

En marso 1982, el ultimo djudyo ke kedava en la isla, Ermandos Mordos, se muryo en la isla i fue enterrado en Athena. Ansina se eskaparon sinko siglos de prezensya djudiya en esta isla. 

En 1992, en el lugar ande se topava el kal derrokado por el terremoto, la Organizasyon de los Djudyos de Gresya fraguo dos monumentos de marmol a la memoryo de estos dos Djustos. 

La istorya podria eskaparse aki, ama vaj a ver ke ay una chika kontinuasyon. Ama antes, vos keriya dar un penseryo miyo, ke kaye muy byen kon este haber del papa keryendo azer de Pio XII un santo. En munchas okazyones, durante la gerra, vimos ke abastava de dizir no, para azer darse atras al nazismo. Todos konosen la istorya del rey de Danemark dizyendo ke el mismo yevariya la estreya amariya si los djudyos deviyan meterla, i los nazis se travaron, i no uvo estreya en Danemark. 

Lo menos ke se puede dizir es ke Pio XII no tuvo este koraje, ke tuvyeron en Fransya munchos ovispos, komo Saliege en Toulouse, el primero de todos. Asigun Serge Klarsfeld,  la opozisyon de estos ovispos eskapo por djugar un rolo muy importante sovre la politika kontra los djudyos, si no de los Almanes, a lo manko del governo franses. 

Makari si mas muncha djente uvyera  tenido el koraje de solo dizir no…Es vedra ke en vezes no era kolay, ama en vezes si…Por lo ke es de los dos Djustos de Zante, es vedra ke eyos tuvyeron muncho koraje, porke si keriya, el Governador los uvyera deportados sin dinguna difikultad, komo por egzemplo este maestro ke eskondyo a una kriyatura djudiya en su eskola i fue deportado el tambyen, delantre del chiko Louis Malle ke despues lo konto en su filmo Adieu les Enfants (Adiyo los chikos). 

Agora, komo me keda otrun poko de tyempo, kyero eskapar kon la istorya de esta senyora Leora Goldberg. Poko tyempo antes de aboltar en Israel, se va a la banka, i troka euros kontra dolares. El empyegado de la banka se yerra, i, sin tomar ni su nombre ni su adreso, en vez de darle 1000 dolares, le da 10.000…Era muy kolay de irse kon las paras, syendo ke dinguno le aviya tomado su nombre. Ama kuando se apersive del yerro, Leora demanda de ver el direktor de la banka. ¿Ah, eya es la de los dolares? le demanda pishin el ditrektor i la aze entrar en su ofisyo. Un ombre, al lado de el, da una siya a Leora. 

Leora da atras la moneda demaziya, dizyendo ke eya es una mujer onesta, indimas kuando se trata de gregos de esta isla, por la manera ke se komportaron kon los djudyos. El direktor no dize nada. Al lado de el, el ombre ke aviya dado la siya a Leora i ke dainda no aviya avyerto la boka, se torna verso Leora i le dize, kon lagrimas en la boz : «En tanto ke inyeto del Mayor Karrer, me syento muy esmovido i vos agradesko». 

Al djueves ke vyene, si kyere el Dyo ! 

Fuente: Ladinokomunita