eSefarad Noticias del Mundo Sefaradi
TE AMO ISRAEL
Komo de palavras topar,
para dezir ke te amo, Israel.
Tu tierra espandida en Negev
i entre tres mares eskondida.
Por tu vida todo bueno kero azer,
para el puevlo- pas tener.
El mundo entero deve saver-
para los djidios es la tierra de Israel.
Del avion Haifa vidi,
alumbrada kon muncha klaredad.
Esta panorama en mi vida no se olvida,
tan ermoza estava la sivdad.
Abashi del avion kon alegria,
me asuvi en la montanya Karmel,
tanta ermozura no konosia,
arvoles vedres, grandes hoteles…
Mi suvrina me amostrava
ande las kreaturas se eskondian
en el tiempo de la gerra
i muncho mal sufrian.
Todo paso Haifa engrandesio,
i su rika kultura enfloresio.
Agora la vida es komo primavera.
Ke krese i engrandese la sivdad entera.
——————————————————————————
Grasia Jak Albuhayre
Livro Nº 3 – 2012
Sofia – Bulgaria
Gracia Jak Albuhaire es de Karnobat- sivdad chika en Bulgaria. Era profesora, jurnalista. Eskrive poezia i proza en bulgaro i poezia en djudeo- espanyol. Eya partisipa aktivamente en el klub “Ladino” de Sofia, Bulgaria.
