eSefarad Noticias del Mundo Sefaradi
OTONYO
Las ojas de los arvoles
estan kayendo.
Los pasharos se fuyeron.
Las flores estan kavesa abokando.
Las yervas se sekaron.
Rozas en la guerta no kedaron.
Kae luvia- trae lodo,
kuvierto kon duman esta todo.
Sin demandar vino el otonyo.
Raro va salir el sol.
Presto el invierno va venir
i nyeve mos va traer por souvenir.
Agora el tiempo esta araviado.
El kampo esta solo- asolado.
En el sielo ni una estreya,
otonyo vino en el pais muestro.
——————————————————————————
Grasia Jak Albuhayre
Livro Nº 3 – 2012
Sofia – Bulgaria
Gracia Jak Albuhaire es de Karnobat- sivdad chika en Bulgaria. Era profesora, jurnalista. Eskrive poezia i proza en bulgaro i poezia en djudeo- espanyol. Eya partisipa aktivamente en el klub “Ladino” de Sofia, Bulgaria.
