eSefarad Noticias del Mundo Sefaradi
LUVIA GRANDE
Afuera estava luvia fuerte kayendo.
Las damlas en la ventana estavan batiendo.
Detras de la kaza, agua komo rio estava korriendo.
Estava en la kamareta por la ventana mirando,
sola, en el minder largo asentada.
Afuera paresia ke el sielo se esta avriendo,
en la kaye la djente se estavan fuyendo.
Truenos fuertes, uno atras de otro korriendo
i rayos komo lumbre estavan kayendo.
Al lado de la ventana avia pozo,
i un arvole de abramilas ermozo.
Enduna un ruido se oyo
i un rayo en la tierra se undio.
La ventana kon dales se tapo.
Eh, komo de luvya grande kayo.
El rayo su mano kaente metio,
el arvole kon abramilas korto,
i un espanto en mi korason kedo.
——————————————————————————
Grasia Jak Albuhayre
Livro Nº 3 – 2012
Sofia – Bulgaria
Gracia Jak Albuhaire es de Karnobat- sivdad chika en Bulgaria. Era profesora, jurnalista. Eskrive poezia i proza en bulgaro i poezia en djudeo- espanyol. Eya partisipa aktivamente en el klub “Ladino” de Sofia, Bulgaria.
