eSefarad Noticias del Mundo Sefaradi
KONSEJA VYEJA
Un Sultan se keria kazar,
ampeso por el mundo mujer bushkar.
Embio kazaminteros
en lugares muy leshos.
Toparon una ija ermoza, komo roza,
kamino largo en tyempo kayente.
Se kanso, keria agua bever
enfrente un rio le disho sin detener:
– Si me das oja- agua vas a bever.
La muchacha agua bevio i oja le dio.
Por el kamino largo ine vido rio,
Agua bevio, i oja le dio.
En este kamino largo i kaente
agua bevio i oja dio…
fin ke deznuda kedo.
El Sultan la vido i disho:
– no es para mi, sin ojas kedo.
Toparon otra roza ermoza,
para ke el Sultan se la goze.
Por el kamino largo i kayente,
agua no bevio,
se amorcho i se seko.
– No es para mi – disho el Sultan
– esta vieja, esta seka.
Embiaron tresera roza ermoza.
En el kamino largo i kaente
vido rio. Agua bevio i oja dio.
Despues kamino, vido rios- los paso.
Agua no bevio i ojas no dio.
Serka del palasio del Sultan vido rio,
agua bevio i se afresko.
Vido el Sultan la ija ermoza,
se enamoro en esta freska Roza.
Eya va a ser mi mujer,
kon eya kero la vida pasar.
La roza deve saver,
kuando i kon ken, agua bever.
——————————————————————————
Grasia Jak Albuhayre
Livro Nº 3 – 2012
Sofia – Bulgaria
Gracia Jak Albuhaire es de Karnobat- sivdad chika en Bulgaria. Era profesora, jurnalista. Eskrive poezia i proza en bulgaro i poezia en djudeo- espanyol. Eya partisipa aktivamente en el klub “Ladino” de Sofia, Bulgaria.
