Poesía: ASPERA, LUS de Grasia Jak Albuhayre

ASPERA, LUS

Aspera, lus,
no te amates!
En esta vida estrechada,
aklarame.
Tengo echo de skapar,
fuersas i salud dame.
En el mundo agora
ay tanto eskuridad
i munchos males kada ora.
i tu keres ke me duerma?
Sin venir la noche mia?
Komo se durme en este
tiempo kruelo,
kuando en el mundo ay
djente sufriendo?
Agora me ambezi avlar,
kon las yervas i las flores
i tu keres ke me durma?
Aspera, lus!
Tengo echo de skapar.
No te amates,
en este tiempo araviado,
aklarame!

——————————————————————————

 

Grasia Jak Albuhayre
Livro Nº 3 – 2012
Sofia – Bulgaria 
Gracia Jak Albuhaire es de Karnobat- sivdad chika en Bulgaria. Era profesora, jurnalista. Eskrive poezia i proza en bulgaro i poezia en djudeo- espanyol. Eya partisipa aktivamente en el klub “Ladino” de Sofia, Bulgaria.