Poema: "Sivdá de mi chikés" de Miriam Raymond Sarano

SIVDÁ DE MI CHIKÉS

 

Sivdá de mi chikés vini a toparte,
Sivdá de mi chikés torní a ti.
Kalejas konosidas ulvidadas,
En tram i en metró yo vini akí.

En el lugar ke era la mi kaza
Amigos i vizinos no stan mas.
A mí sólo mirando la ventana
Me paresió de ver papá i mamá.

La fabriká de dulses sta serrada,
El panadero pan no aze mas.
Golor siento de pan i chikolata,
Savor de mi chikés al paladar.

Sólo la meaná st`aínda avierta.
Ya sto burracha mizmo sin entrar.
“Sinyora, kualo bushkas?” me demandan.
“Yo bushko mi chikés ke no sta mas”.

Rekordos tanto dulses i keridos.
El tiempo se kedó ay para mí.
Sivdá de mi chikés vini a toparte,
Sivdá de mi chikés torní a ti.

Miriam Raymond Sarano
Ramat-Gan 22.12.04

 

MIRIAM RAYMOND SARANO

   Nasió en Milano en el 1945 de djenItores de Turkía. Estudió en la Eskola de la Komunidad Djudía de Milano, i tiene el diploma de kontable rekonosido (1963). Izo su aliyá a Israel en el 1967.
Se kazó en Israel en el 1970 kon Eddie Raymond, proveniente de India.
Tiene dos ijos: Moshé (1971) i Avi (1975).
Lavoró siempre komo kapo kontable. En los últimos 10 anyos lavora en
«Mercedes Benz» (otomobiles). Mora en Ramat-Gan.
De su chikés se okupa en su tiempo líbero de místika i de esuenyos, de kartas i de kristales. En el 1995 publikó el livro «Enkontros entre esuenyos».
Fue entervistada munchas vezes por la Radio i la Televizión, i por varios jurnales también sovre estos sujetos. Dio konferensias en la Universidad de «Ben Gurión» en el Négev,  en munchos otros institutos superiores i en jornadas de estudio.
Eskrive artíkolos, kantigas i poezías en ladino, publikados por «Aki Yerushalayim», «Rodes», «El Amaneser» i en los livros de Matilda Koén-Sarano.
Partisipó a todos los «Festiladino»s kon kantigas, del 2003 asta el 2008. En el 2003 una kantiga  suya: «En suenyo te vi», muzikada por Betty Klein, resivió el treser premio.

(Ramat-Gan, 2010)