Poema: LO BUENO DEL MUNDO de Beatriz Mazliah

Del libro inédito «TRAPIKOS DEL ALMA» de Beatríz Mazliah

LO BUENO DEL MUNDO

 

Ay,
ávreme la tu puerta,
mi lusero,
ávreme tu korasón

De lo bueno del mundo
kero un piziko para gostar

Ven,
asiéntate a mi meza,
duenya mía,
k’ansí el vino savrá mijor.

De lo bueno del mundo
kero un piziko para gostar

Ten,
almendrikas y pinyones,
alma mía
del rosho karpuz el korasón.

De lo bueno del mundo
kero un piziko para gostar

Hoy,
akóstate en la mi kama,
reyna mía,
Lino de Olanda i golor de sol.

De lo bueno del mundo
kero un piziko para gostar