eSefarad Noticias del Mundo Sefaradi
Exclusivo eSefarad
Pazado mierkolés 11 de Abril en el Instituto Cultura y Sociedad de la Universidad de Navarra, en Pamplona, se bivieron estas Sigundas Djornadas Sefardíes, kon muncha alegría i éksito para sus organizadores. Es la sigunda anyada ke se organizan estas importantes Djornadas kon temas de interezo kultural, arkeolójiko , gastronómiko, istóriko i muzikal sefardí, aviertas a todas las presonas kon interezo en la kultura i lingua muestra.
Tuvimos la oportunitá de partajar musafires en las “II Jornadas Sefardíes: Sefarad tangible e intangible” dientro del nomado proyekto “Creatividad y Herencia cultural”, organizadas por el «Instituto Cultura y Sociedad», i por Ania Dulska, Istoriadora, Investigadora i Directora del Área “Creatividad y Herencia cultural” del ICS, ermoza presona, i organizadora de estas Djornadas Sefardíes.
Ansí viashamos a Pamplona kon mi madre Matilda Barnatán i el talentozo múziko i kompositor Pablo Sallabera, para prezentar el resital poétiko-muzikal “Luvia de Estreyias i Rozas en Sefarad”, ke serrava las Djornadas.
Muy esmovidos injunto a la djente se prinsipiaron en la tadre del día mierkoles 11 las Djornadas ke se avrieron kon las palavras de Ana Marta González, ke dio la bienvenida a las djentes, ke kon gran interezo se aserkaron para partajar estas Djornadas kulturalas en Pamplona, Navarra.
EL INSTITUTO DE CULTURA Y SOCIEDAD DE LA UNIVERSIDAD DE NAVARRA
El «Insituto de Cultura y Sociedad» (ICS) es el sentro de investigación en «Humanidades y Ciencias Sociales» (Umanidades i Sensias Sosiales) de la Universidad de Navarra.
Nasió en la anyada 2010 kontinuando un model de ekselensia investigadora, fraguado por el tiempo de más de medio siglo en unotras áreas del sentro akadémiko komo la empresa (traverso el IESE), la investigasión biomédika -Klínika i CIMA o la ingeniería-CEIT.
Este destakado Instituto baza su importante lavoro en kuatro puntus: la kalitá shientífika, la internasionalitá, las interdishiplinas, i el impakto sosial.
Ansí se fraguan i kresen diferentes proyektos ke luego ven la lus, komo por enshemplo en rolos de kultura emosional, kreatividad i erensia kultural, edukasión de los afektos umanos, Navarra Center for International Development, Programa Atlantes»: Dignidad umana i hazinuras, relijión, sosiedad sivil, edukasión en eskolas de Latinoamérica (enjunto a la «Facultad de Educación y Psicología»).
Su direktor, Jaime García del Barrio, mos aze konoser i partajar de todos estos proyektos kon el apoyo de todo el ekipo de profesionales ke kompozan este atirante «Instituto de Cultura y Sociedad de la Universidad de Navarra».
La istoria de este «Instituto de Cultura y Sociedad» es muy atirante ya ke dirije distintos devates, siklos de konferensias, ponensias, djornadas i enkontros atados a la kultura, la istoria, la sosiolojía i la filosofía entre munchos rolos. Un ekipo de presonas espanyolas i de diversos paízes ke enrikesen la kultura amostrando a las vizinos i elevos, sus importantes butos kulturales i sosiales, ansí komo ofreser ayuda i apoyo a paízes mas menesterozos.
II JORNADAS SEFARDÍES: SEFARAD TANGIBLE E INTANGIBLE
SELEVRASIÓN DEL V DÍA INTERNASIONAL DEL LADINO
Una tadre muy espesial onde prinsipiaron las Djornadas Sefardíes, ke ya prometía interesantes temas i aspektos istórikos, komo la prima ponensia “Arqueología en Sefarad: espacios y artefactos” un kolokio onde se topava a la kaveza Sergio Vidal del «Museo Arqueológico Nacional», Miguel Ramos («Gabinete de Arqueología Navark S.L.») i la maksimala organizadora de estas Djornadas, Ania Dulska, (Polonia) ke es la Direktora de Istoria en rolo, komo ya vos dimos informasión, de Kreatividad i Erencia Kultural, en temas atados a la gueya istórika, el Patrimonio, i ansimezmo el universo sefardí en Navarra i en Sefarad.
La unotra ponensia muy atirante “Cultivando la vid, cultivando la tradición”, yegó de la mano de Miguel Fernández de Arcaya, ke mos izo konoser kon sus vinos kosher de Navarra, un savor ekskisito kon las ekplikasiones sovre la vida i tradisión djudías tanto en shabat i en las festividades, komo en la serkana paskua, Pesaj, ke bivimos kon el vino i la alegría de ser líveros por mano del Dió. Miguel destakó la importansia del kidush, mos ofresió la istoria de la vid i komo se aze este riko vino para ke seyia kosher, de las Bodegas Fernández de Arcaya, de estas maravyiozas tierras de Navarra, rika en vedre i en kumidas i vinos, komo bien pudimos gostar.
Por dar fin a las variadas ponensias de estas Djornadas, para plazer de las djentes, ya mos aserkávamos al sierre kon el tema ansimezmo poétiko i muzikal kon la ponensia de titoló: “¿Se ha roto el hilo? Los judíos de Marruecos: tradición poético-musical e identidad”, por Sarali Gintsburg (ICS).
EL RESITAL POÉTIKO MUZIKAL: “LUVIA DE ESTREYIAS I ROZAS EN SEFARAD”
MATILDE GINI BARNATÁN (RESITASIÓN DE POESÍAS), VIVIANA RAJEL BARNATÁN (RESITASIÓN DE POESÍAS I KANTES), I PABLO SALLABERA (BAGLAMA I GUITARRA, KOMPOZISIONES MUZIKALES)
Se ofresió un aperivito ke prinsipió kon el kidush, i ya se aparejava la djente para el resital ke serró las djornadas i onde tuvimos el plazer de partajar, ansí entre las poesías i relatos las djentes aplaudían esmovidas, aresivimos la luvia de palavras de destakados poetas internasionales ke eskriven en muestra lingua, rekodrando las memorias i mesajes ke kedaron en las Djuderías i kalejas de Sefarad, en Pamplona ofresiendo ansimezmo un dokumento istóriko sovre vida djudía en Pamplona.
En este viashe poétiko muzikal ke partajamos kon el púvliko de Pamplona i su magnífiko arresivimiento, pasearon por el shenario las poesías de autores komo Avner Pérez y Matilda Koen Sarano, de Israel, Isahar Avzaradel de Grecia, Izan Konorti de Bulgaria, David Fintz Altabé y David Simán, de los E.E.U.U., i de Sefarad, eskojimos al poeta Juan Carlos García Hoyuelos, kon su ermoza poesía d’amor, traduisida en djudeoespanyol, indemás de muestras poesías ke enjunto a la baglama i guitarra de un maravyiozo Pablo Sallabera, mos yevó a rebivir las memorias de Sefarad.
Interpretó Pablo, el múziko una kompozisión suya djustamente titulada “Memoria” ke esmovió en lo profondo a todas las presonas prezentes, i ansí viashamos en el tiempo traverso la poesía, los kantes, los pásharos, las djuderías i la múzika a tierras de Salónica, Rodes, Bulgaría, Israel o Buenos Aires, los mesajes kedaron en la “Luvia de Estreyias i Rozas en Sefarad”, komo dishimos, las estreyias son las memorias de los ke fueron akayados, refuzados de Sefarad, ke tornavan en esta luvia i sus palavras kedaron komo rozas bivas entre las sonrizas i la emosión de las djentes.
Es djusto rengrasiar a los organizadores de éstas magnífikas “II Jornadas Sefardíes: Sefarad tangible e intangible”, a Ania Dulska, korasón de las Djornadas, ke mos eskojió las más ermozas rozas de Pamplona para el resital, ansí komo a las presonas ke paratajaron estas Djornadas ke adjuntavan istoria, literaturas, gastronomía, arkeolojía, poesía i kantes , onde ya tomimos la palavra de la organizadora Ania Dulska, si el Dió lo kere, de toparmos de muevo la anyada vinien, para kontinuar rekodrando la lingua djudeoespanyola, en unas muevas Djornadas Sefardíes.
Sefarad, tangible e intangible…
“I la luvia de estreyias en la nochada mos rekodrará los mesajes i bivensias, ke komo rozas kedarán para siempre en la memoria de Sefarad”…
Viviana Rajel Barnatán
Subdirectora “Emisión Sefarad”
Radio Exterior de España
Radio Nacional de España
http://www.rtve.es/alacarta/audios/emision-en-sefardi/
Presidente de la Asociación Cultural “Luz de Sefarad”
