eSefarad Noticias del Mundo Sefaradi
Ver todos los artículos de esta sección
La nave Struma
por Albert Israel
La nave «Struma» fue konstruktada en el anyo 1867, en un porto de la Ingletierra. En el anyo 1941, el muvimyento de los revizyonistos en Romania desido de organizar un fuimyento de djudyos del rejim fashisto kon el buto de ayegar a Erets Israel. En el 11 de novembre 1941 se enbarkaron 768 djudyos, entre eyos 103 kreyaturas, a la nave Struma i partyeron del porto Konstansa, debasho de la bandyera de Panama. La nave era vyeja i no teniya las fasilitades ke eran menester para transportar este montante de pasanjeros. Aparte de esto kada dia se le bozeava otra koza. Dospues de 4 dias la nave reusho a arivar a Turkiya. En la entrada del Bosforos el motor de la nave se bozeo i no pudo kontinuar la navigasyon.
Las otoridades marineras de la Turkiya remorkaron la nave fin a serka de Sarayburnu en el bosforos i echaron la chapa enmedyo de la mar. Los pasanjeros teniyan la esperansa ke en Turkiya va ser mas kolay de tomar papeles nesesaryos para entrar a Palestina. Los turkos prekuparon de tomar permisyon de los inglezes para ke los pasanjeros kontinuen a Palestina. De la otra vanda la Agensiya Djudia izo esforsos ke los inglezes permetan a los pasanjeros vinir a Palestina. Los inglezes refuzaron a todos. El lord Moyne, ministro de las kolonias, se metyo enmedyo para evitar todas las posibilitades a ke los pasanjeros ayegaran a Palestina. Los turkos bushkaron otro paiz ke aksepte aresivir a estos pasanjeros, malorozamente no toparon.
Solo el riko grande de Turkiya, Vehbi Koch, reusho kon su enfluensa, de salvar a un lavorante suyo de la Romania kon su mujer i su ija i eyos pudyeron abashar de la nave. Kon eyos abasho i una mujer prenyada.
Los pasanjeros estavan blokados en la nave mas de dos mezes. No pudiyan abashar de eya. Las kondisyones sanitaryas estavan graves. Travaron de friyo, de estrechura, de suzyeda i de ambre. Sen enhazinaron de dizanterya.
Los djudyos de Estanbol mandaron kon barkas ayuda de komer i kuvyertas. La Komite Joint perkuro ke los turkos los tomen a los pasanjeros a un kampo temporaryo i no reusho.
A la fin, los turkos remorkaron la nave a la mar preta, afuera del borde turkano, i la desharon en medyo de mar sin motor i sin chapa.
En el 24 fevrero 1942, un torpedo aharvo la nave i Struma se undyo. Todos los pasanjeros se aogaron i se muryeron, aperte de uno solo ke era mansevo de 18 anyos, David Stolyar. Pishkadores turkos lo salvaron dospues ke estuvo noche entera en las aguas entezadas.
Stolyar arivo a Palestina, servyo en la armada ingleza durante la gerra mondial, servyo en la «Hagana» i gerreyo en la gerra de independensya de Israel. Dospues de la fondasyon de Israel bivyo unos kuantos anyos en japan i se enstalo en los Estados Unidos. Stolyar muryo en 2014.
Los ke entyenden en turko pueden oyir aki a Ishak Alaton kontando esta desgrasya kon los detaylos, en un filmo muy enteresante:
Otro un filmo kontado en inglez:
Albert Israel
