eSefarad Noticias del Mundo Sefaradi
Ver todos los artículos de esta sección
Murir doz vezes (3)
por Albert Israel
Mi nono Ernst vino kon su famiya i sus ermanos a Israel en los empesijos de los anyos 1930. Durante los anyos un ermano paso a bivir en ingletyerra. I de aya es ke tenemoz esta erensya de kaza. Este modo empesimoz esta investigasyon. Esto es lo ke savemoz…
Mi nono, Mano, bivyo en Innsbruck. Ke famiya teniya aya? Komo se puede saver?? Niko me dize, moz iremoz al arshiv de Tyrol i demandaremoz a ver su testamento. A ken desho sus byenes antes de murir??
Moz fuimoz al arshiv de Tyrol. Moz toparon el testamento. «Yo, Ernst Bechinski, lego todos mis bienes a la komunita djudia de Innsbruck…» Ke deziluzion… Ma kualo es esto? Ay abasho sinyaturas de testigos… Anna tripier, Erna Laam i su marido Natan Laam. Las dos ermanas de mano ke moran endjuntos en Innsbruck, testigaron en el testamento… 10 dias antes ke se muryo. Si vamoz a saver la alkunya de kaza de estas dos ermanas puede ser ke vamoz a saver la alkunya verdadera de mi nono Mano…
En el internet topimoz una desendyente de la famiya de Natan Laam i de eya moz ambezimoz ke la alkunya de mi nono Mano, es Willner. Bushkimoz en el arshivo de Viena i topimoz ke Mano es Emmanuel Manek Willner. I mas topimoz ke se konosyeron kon Ilse antes de la gerra. Ilse ke su famiya eran nazistos lo alojo a Manek en su apartamento, en Zagreb, i lo eskondyo en un almaryo sekreto durante la gerra entera. En los dias de bombardemanes Manek no pudiya abashar a los abrigos de abasho.
No ay safek ke Ilse lo amava muncho a Manek. La prova es ke se kazaron un anyo dospues ke se termino la gerra, en 1946. En los arshivos tsionistos en Yerushalayim topi dokumentos ke en el anyo 1950 Manek estava en Israel, todo el tyempo kon el nombre de Bechinski. Tuve sentimyentos fuertes ke mi nono i Manek se konosiyan de antes i ke mi nono saviya ke Manek esta empleyando su nombre en Viena. No, puede ser ke no se enkontraron kon mi nono en Israel. Ma estos sentimyentos no tenian provas.
Niko me telefono i me propozo ke venga a Viena. Ke moz enkontremoz en el apartamanto ke Morava mi nono en su chikes, en Adambergergasse 7. Me avizo ke topo dokumentos muevos. Moz topimoz aya kon Niko i Andreas. Un apartamento grande i vyejo. La famiya Bechinski moravan en el numero 3. Niko me amostro dokumento ke en el numero 10 morava la famiya geber. El ijo, Vilhelm geber, meldo en la mizma eskola i en la mizma klasa kon mi nono Ernst.
Niko Hofinger: «Topi a la inyeta de Vilhelm Geber en Los Angeles. Me mando un anvelop yeno de letras i fotos ke aparteniyan a su nono i ke eya no las puede meldar porke estan eskritas en alman. Dainda no lo avri el anvelop. Moz iremoz a un luguar silensio i lo avriremoz».
Mos fuimoz a un luguar silensio i avrimoz el anvelop. Topimoz munchas letras ke Vilhelm eskrivyo a su mujer. I fotos. De estas letras entendimoz ke mi nono Ernst, Vilhelm i Manek eran amigos. Ke mi nono le empresto a Vilhelm medya lira sterling. Ke Manek esta para detener en Viena (en los dias ke la Almanya okupo a Austria) i kere ke Vilhelm le ayude a obtener viza a Suiza. Ke manek es naivo porke dingun Polanezo no puede arivar a Suiza kon pasaporto polanezo. Ke Vilhem esta entrisrado por Manek. Ke Manek esta bushkando persona en Viena ke asemeja a el…(??)
Bueno keridos. Dospues ke meldimos estas letras entendimoz ke:
Emmanuel Manek Willner, Vilhelm Geber i Ernst Dadi Bechinski nasyeron en los empesijos del sieglo 20. Manek en Polanya, Wilhelm i Ernst en Viena de Austria. Manek emigro de Polanya a Austria i los konosyo a Wilhelm i Ernst. Los tres eran djudios i amigos Buenos. Wilhelm i Ernst moravan en el mizmo apartamento i meldavan en la mizma klasa de la mizma eskola. En los empesijos de los anyos 30, del sieglo 20, Wilhelm emigro a Suiza, Ernst emigro a Israel, Manek kedo en Viena. Kuando los Almanes okuparon a Austria Manek se kijo fuyir de Viena. Por esto tenia menester de eskonder su identitad Polaneza i trokarla kon otra identidad de una persona ke parese de kara a el. Este modo los amigos se dieron de akordo ke Manek va tomar la identitad de Ernst. Ya se asemejavan. Este modo pasaron Manek I Ilse a Zagreb. Manek se eskondyo en el almaryo durante la gerra. Dospues de la gerra desido a kedar kon la identitad mueva en Viena, tomo la kopya de su sertifikato de nasimyento i se kazo kon Ilse. Komo se vino azer el prezidente de la komunita djudia? Esto dainda no lo savemoz.
Por siguro ke estash demandando si mi madre se patroneo de la kaza en London? Si keridos, lo konvensimoz al avukato.
I Ilse? Yad Vashem estan investigando si se le puede dar el titolo de «Djusta entre las nasyones».
Niko Hofinger kontinuo a investigar este sujeto i en serka se va publikar su livro ke va enkluir mas repuestas a mas demandas.
I yo, dospues de 5 inyos eskapi este filmo dokumentaryo, «Tu mueres solo dos vezes», ke lo puedesh ver en estos dias en los ekranes.
Aki tenesh el trailer:
Fin.
Albert Israel
