eSefarad Noticias del Mundo Sefaradi
Viernes la tadre…Me akodro tan klaro esta mas importante noche de la semana! De kuando eramos chikos me impresiono muy mucho.
Mis ermanos I yo, veniamos de la eskola…la kaza estava limpia, limpia…los jornales estavan en basho en la mushama…Mama mos dava banio en la kuzina, onde estava el banio.’ Despues mos vestiamos en vestido de Shaba. Papa venia del lavor kon algoun jouet o un pedaso de chokolat en la aldekera para todos los ijos. Yo me konsiderava espesial, ke yo era la sola ija en la famiya..i dezia’ Ke tienes para mi” Respondiva…’no se-mira a la aldikera’ Siempre avia una koza–un jouet, un pedaso de chokolat.
Despuez ke se banio I vistio Papa, todos veniamos delantre de el para ‘La Bendision de Shaba’ Mos metiamos de djenoio delantre de el, metia la mano a la kavesa I mos dava la bendision. A la fin a mi, me dezia…’Novia ke te vea!’. Mi famiya no eramos relijiosos, ama esta tradision teniamos I era muy importante I impresionante.
No se komo lo azia todo porke mi Mama lavorava kon Papa al echo…ama eya estava gizando I alimpiando todo el dia…las borekas, pasteles, biscochos, el peshe, sopa fijones I huevos enhaminados estavan todo pronto. Mi mama mos azia a kada ijo una torta espesial. A mi me plazia de pruna I kaisi, Samiko le agradava de mansana, I Isaac le plazia otra fruta.
No avia noche de Shaba ke no teniamos kompania! Tios, Tias amigos de mis parientes venian o a komer o despuez de komer. Las kandelas se alumbravan, el Kadosh I las bendisiones al pan o a la komida dichos…el raki pasava para todos…siempre mos davan a los chikos un poco de raki kon mucha agua….ke se azia como leche en el vazo….i la komida se komia I eskapava.
Despuez de komer empesavan las alegrias! Alguno dezia, ‘Ayde, mete una plaka’ I la victrola, un grande mueble, se avria I koreada…Yo tenia de suvir en una siya, ke era muy chika..puede ser 8 a 10 anyos, .i el kantar I bailar a la Turka empesava. Papa kitava una riza de la aldekera I me la dava a mi, Ayde, Daisika, baila, baila ansina..ansina…ya se le manea, ya se la manea, ets..i ansina bailavamos por oras. Para los chikos era una koza espesial I no mos echavamos asta las diez de la noche. Si sero los ojos lo puedo ver delantre de mi….la shena entera! Ke memorias!
Daisy Alalouf Newell
Florida, USA
Para Ladinokomunita
