eSefarad Noticias del Mundo Sefaradi
NO KEDAN TRASAS DE LOS KAMPOS DE DETENSION EN CHIPRE
El Profesor Emanuel Gutmann [1] mos dio una idea sovre los 52.000 djudios detenidos en los kampos en Chipre entre 1946 i 1949.
En los anyos de 1940, en la sigunda mitad, Chipre era un lugar de detension forsado para desenas de miles de djudios. Esto no fue tanto mensionado basho la Administrasion Britanika. Los kampos djugaron un rolo grande en la independensia de Chipre i de Israel. Lo ke disho el mos ayuda a entender todo de un punto istoriko. Despues de la Gerra los sovrebivientes del Olokosto empesaron a irsen a Palestina. La QUOTA Inglesa no los permetia de entrar ayi en numeros grandes. Tenian ke topar otros kaminos para ir a Palestina. Esto era kontra la ley i no se savia lo ke los asperava en este kamino. La Marina Inglesa atrapo a 39 barkos i los izieron desbarkar en Chipre. Avian 52.000 pasajeros en soma.
Fraguaron Kampos de Detension i estos refujiados se toparon biviendo en kondisiones muy duras. Avian 9 kampos a traverso de la Isla en distansias de 50 kilometros entre unos i los otros. Munchos se toparon en CARAOLOS al norte de GAZIMAGOSA i afuera de LARNACA en DEKHELIA. Estos refujiados eran de la edad enre 13 i 35 anyos. Nasian ayi 3 bebes kada dia i durante el tiempo ke estavan ayi tuvieron 2000 bebes. Al torno de los kampos avian ilos komo en las priziones, i esto tomava lugar 2 anyos despues de la salida de los Kampos de Konsentrasion en Evropa. Esta djente ke kerian fuyir del Olokosto se toparon una vez mas detenidos.
Finalmente Israel interveno despues de su independensia i desharon partir a los refujiados djudios poko a poko. En 10 Febrero 1949, despues de 267 dias del nasimiento de Israel, partieron los ultimos detenidos.
Uvo una konferensia entre el embasador de la parte Grega de Chipre Michael Harar i la Chambre de Commerce Chipriota i Israeliana, Christakis Papavassilou. Ahi se topava tambien Martin Strohmeier Emanuel i konto lo ke vido ayi.
En 1960 salio el filmo de Exodus» i Paul Newman djugo en el rol de Ari Ben Canaan ke ayudo a los djudios klandestinos.
Despues de 62 anyos las trasas de estos kampos ya estan desparesiendo. Keren meter ayi por lo menos un monumento i Gutmann va azer todo para ke sea realizado.
Trezladado del jurnal Shalom de Estambul del turko al ladino por Shimon Geron para LK
EKSPOZISION: FOTOGRAFIAS DEL KAMPO DE DETENSION EN CHIPRE
Trezladado al ladino por Liliana Tchukran de Benveniste
El Muzeo Eretz Israel en Tel Aviv avrio en disiembre de 2009 una ekspozision de Rachel – Fotografias del kampo de detension en Chipre.
– Klikar en las fotos para agrandar –
 |
 |
 |
Rachel Fisher, aedada de 84 anyos (en 2010), nasio en Transilvania, en la sivda de Cluj, komo Edith Kornhauser.
Estudió la fotografia kon su tia i konsigio merkarse una makina de fotos. Rachel konta ke esa makina la akompanyo en todas las partes desde ke tuvo 14 anyos i ke muy pronto su «hobby» -pasatiempo- se troko en su lavoro i profesion.
En el anyo 1944 , los djudios de Transilvania fueron deportados a Auschwitz donde Rachel pedrio a kuaji todos sus parientes i amigos, sovreviviendo solo eya i su madre. Despues de la Gerra , eyas konsigieron tornar a Cluj, onde Rachel se adjunto a su novio de djuventud, Yehudah Fisher, i se kazaron.
Los 3 empezaron su viaje a Palestina, en disiembre de 1947, en el vapor ilegal Pan York. Djunto kon Pan Crescent, los vapores yevaban15.000 pasajeros, sovrevivientes de Olokosto. Los inglezes detuvieron los vapores i los pasajeron fueron mandados otruna vez a un kampo, esta vez en Chipre.
Rachel konta: «la djente keria yevar una vida normal, tenian ijos, se kazavan i mizmo organizavan ekspozisiones de arte, porke munchos de los pizioneros eran artistas , arkitektos, pintores, i yo lavorabakon la fotografia. Kada diya asperavamos yegar a Palestina»
La parte sentral de esta ekspozision muestra las fotografias de Rachel i mas delantre se veran tambien las pinturas, pelikulas, muzika i artikolos de filatelia.
Los kampos de detension en Chipre estuvieron funsionando ente agosto de 1946 i fevrero de 1949. En este tiempo 52.000 inmigrantes estuvieron prizioneros en el kampo.
La ekspozision estuvo avierta asta el 30 de marso de 2011 i el kurator de la ekspozision fue Guy Raz
—————————————————-
[1] Emanuel nasio en Munich en 1924 i en 1936 imigro a Palestina kon toda su famiya. Estudio en la Universidad de Yerushalayim i a la edad de 23 anyos se fue a Chipre komo un profesor, al titlo de voluntario. Vido esklavitud i despues se fue a la Universidad de Columbia en los Estados Unidos para azer estudios politikos. Resivio su diplom en 1958 i lavoro en el Konsulado Israeliano en Nueva York. Despues desde 1991 asta su retreta lavoro komo Profesor en la Universidad Ebrea.