eSefarad Noticias del Mundo Sefaradi
Ver todos los artikolos de esta seksion
Saludes a todos
Edmond Cohen
Paris – Fransya
______________________________________________________________
28. LA IDA DE ALBERT
Ama un diya mi padre vyene a ver mi tiya, i, no sé komo, andevino ke se va fuir de Paris i desharme. I de fakto, la situasyon se izo insoportavle en Paris. Pishin en el enverano 1941 (un anyo antes del aferramyento del Vel d’Hiv) 42 avokatos djudyos de Paris, fransezes i ke por munchos de eyos an sido askeres en la gerra de 14-18, son aferrados i embiyados en el kampo de Drancy, ande Jacques Charpentier, kapo de los avokatos, se va a verlos pishin. Ah, vino para salvarmos, pensan los desmazalados. « Vengo para anunsyarvos ke, asigun las muevas leyes sovre los djudyos, sosh echados de la lista de los avokatos. Adio, Senyores », se abasta de dizir sus kapo, ke se va, misyon kumplida… Badinter konto este triste fakto istoriko en un livro, « Un antisémitisme ordinaire : Vichy et les avocats juifs (1940-1944) » ke embatako bastante la reputasyon de rezistante de este kapo…
De toda manera Albert no tadro de entender ke si los avokatos fransezes son aferrados, un konsilyo juridiko apatrid komo el tyene pokas esperansas de konoser una mijor suerte. Pishin al empesijo del anyo 1942 apareja su ida en zona dicha libera, lo ke para los djudyos es leshos de ser el byervo ke konvyene, syendo el inat de la polisiya franseza kontra los djudyos en zona « libera ». Non okupada seriya mijor dizir.
Grasyas al ayudo de Alfred Légal, su amigo del tyempo de la Eskola de Derecho en Paris, mi padre obtyene un permiso de morar en Lamalou-les-Bains, sivdadika termala en el departamento del Herault, no muy leshos de la sivdad de Béziers.
Yene kale pueder ayegar aya, i por esto pasar a traverso de la linea de demarkasyon, la frontera enre la zona okupada i la zona non okupada. Un mushteri i amigo djudyo le dize ke konose un pasador. Se va bushkar kon kamyon karne en zona libera, i dunke pasa vaziyo a traverso la linea de demarkasyon. Lo aprovecha para pasar djente, en jeneral djudyos, ke eskonde en una kasha sôzde de instrumentos.
Mi padre aferra esta okazyon, i fin de djulyo 1942 se va kon este amigo i kuatro otros djudyos, eyos lehlis. Son dunke sesh para aprovar de pasar. A la ora de traversar la linea, entran todos los sesh en la kasha, i poko manka ke sean aogados, no solo por la chikez del eskondijo, ma tambyen por las emanasyones del gazojen al lado. Ama pasan…
Una vez la linea pasada, el pasador los desha en medyo de los kampos. A eyos de desbrolyarsen para ayegar a sus destinasyones. Los lehlis se van de un lado. En mi livro en franses eskrivi ke uvyera sido interesado de saver kyen eran i kualo les afito. I na ke ay unos kuantos diyas, un primo ermano de mi mujer lehliya mos konta komo paso la linea kon su famiya, i me rendo kuenta ke tuvyeron el mismo pasador ke mi padre ! (el kamyon para bushkar karne, la kasha de instrumentos, ets) Yo konosiya este primo desde unos sinkuenta anyos, ama nunka esto aviya venido en el lakirdi. La sola kuestyon ke keda es : es ke mi padre se fue kon la famiya de este primo de mi mujer (sinko anyos antes de su nasimyento, i yo tenyendo sesh anyos) o eran otros lehlis i eyos pasaron un otro diya ? Esto no sé…
Esto dicho, para no travar las miradas de la djente, indimas kuando el tyempo pasado en la kasha de instrumentos no amijoro la vista de sus vestidos, mi padre i su amigo tyenen de ser a lo manko limpyos i byen arapados. Para esto, kale una sala de banyo, i dunke topar un otel. Ama el otel, es koza muy sekanoza, porke kale eskrivir kartelas, amostrar sus papeles, i la pulisiya vyene tomar las kartelas pishin al amaneser. Albert acheta de ir al otel para durmir un poko i araparse, ma kon la kondisyon de irse al amaneser. Su kompanyero de viaje, el ke topo el pasador, se va kon el al otel. Al amaneser, se alevantan i se aparejan. Albert se inyerva vyendo su kompanyero araparse ancho i largo, tomando todo su tyempo. Esta anchor les kale pagarla : vyene la pulisiya i los aferra. A la djandarmeriya, Albert se pretyende sivdadano turko, de un pais neutro, intokavle. Malorozamente, sovre su karta de identitad de ajeno, al lugar de la nasyonalidad, esta eskrito : « de orijen turka ». De orijen turka, no es turko, responde el djandarma : sosh apatrid. Absolutamente no ! responde Albert kon tanto mas orguyo ke ya save ke esta djugando karo sovre este bluff : de orijen turka, kyere dizir turko de orijen, haliz turko ! El djandarma, septiko, telefonea por avizo a su kapo. El kapo desha liberar a Albert. En kuanto a su kompanyero, todo lo ke sé, es ke la kurtareo el tambyen, syendo ke lo enkontri munchos anyos despues de la gerra (kuando tuve un mushteri keryendo alkilarle una botika).
Despues de esta aventura ke uvyera podido tener konsekuensas definitivas i trajikas, Albert reushe de ayegar a Lamalou- les-Bains, i kuando los Almanes okupan la zona libera en novyembre 1942, Albert se esfuersa de ganar, kual ke sea la difikultad, la zona de okupasyon italyana. I reushe, no sé komo. Se topa en Megève verso el mez de mais 1943.
A kontinuar…
Edmond Cohen
Paris, Fransya
Fuente: eSefarad
