eSefarad Noticias del Mundo Sefaradi
Ver todos los artikolos de esta seksion
Saludes a todos
Edmond Cohen
Paris – Fransya
______________________________________________________________
27. Ande Mina
Ama aboltaremos en el Paris de 1942. Uno de mis mas grandes plazeres es de ir kon mi Mama ande su ermana Mina, i aya de topar a Maryse mi primika, ke tyene solo ocho mezes de mas de mi, ma ke es muncho mas madura i avyerta de meoyo de mi, i ke aze de mi lo ke kyere ; parese ke me tresalgo de esto. Kale akodrar ke es doz vezes mi prima : prima ermana por un lado, syendo ke muestras dos madres son ermanas, sigunda prima por otro lado, syendo ke muestros dos padres son primos ermanos.
Moran kaye Sibuet, en el dodjen arrondissement, metro Picpus. Se puede ir aya kon metro. No el metro Picpus el mismo, la estasyon deviya ser serrada, ma al metro Nation , i despues a pye.
Me akodro del metro del Paris okupado. Mi madre yeva un chapeo kon velika, komo era la moda, i viyajamos en primera klasa, ande las siyas son enkalkadas i kuvyertas por moleskina ; en sigunda klasa, las siyas son de madera. La norma, me lo ambezi muncho mas tadre, es ke solo el ultimo vagon, ke es de sigunda klasa, es permetido a los djudyos. Ama mi Mama no se preokupa por esto, de la misma manera ke no yeva la estreya amariya. Es turka, i se konsidera komo no ovligada por estas leyes. La mitad de las estasyones son serradas, por ekonomiya de gerra. Sovre las paredes de las estasyones ay avizos de reklam komo oy. Ama son muy diferentes. Ovras pintadas por profesyonales, i no fotografiyas. No son trokadas kada semana, ma kedan kaji por syempre. Kaji todas aboltan alderredor de la komida i de la bevyenda : komida de gerra, supa de kub, vino barato, mostasa Pikarome…
Munchas estasyones, dishe, son serradas. A la kontra, en las ke son avyertas, ay muncho mas empyegados ke agora : en mas de un kapo de estasyon en su chiko lugariko en el sentro, a kada entrada uno ke burraka el tikete (kada tikete sirvyendo dos vezes, es burrakado dos vezes). Su ofisyo pishin me paresyo de mi kapachedad : kedarse asentado azyendo burrakos, de esto me syento kapache. I kuando uno me demanda lo ke kyero azer kuando sere grande, respondo sin arrepensar : burrakador de tiketes en el metro. Es vedra ke en el treno mismo, ay, en mas del konduktor, un empyegado para serrar las puertas, i su ofisyo tambyen me parese de mi kapachedad, ama se keda syempre en pye. Me parese mijor de ser burrakador, el a lo manko se keda asentado. De toda manera estos dos ofisyos eskaparon por dezapareser, i tuve de rezolverme de azerme avokato.
Esto dicho, el viyaje Chaussée d’Antin – Nation me parese sin eskapasyon, i me syento apresurado de ver de muevo a Maryse mi primika, i de djugar kon eya, yo ijo regalado, eya ija regalada.
Despues, mi madre me salyo de mi eskola i me metyo para syempre ande su ermana, pensando ke yo seriya mas en seguridad ande eya, porke si Mama es turka, Papa, es, es apatrid, kuando ande Mina, Rodolphe tambyen es turko. Yo lo tomo byen por dos razones : por empesar, no mas tener keazer kon esta negrinyada de maestra en mi eskola ; i sigundo, ver a la kontra a mi primika, kon la kuala vo pueder djugar tanto ke kyero… En kuanto a trokar de kaza, i pasar de un apartamento de ocho kamaretas a uno de dos kamaretas, veo solo lo bueno de la koza : por empesar no tengo mas espanto de los lovos – los poveretos no tyenen mas lugar ande meterse – i de otro lado durmo en la misma kama kon mi primika, le do bezikos, me tresalgo por esto ! Mi tiya Mina es komo una madre kerensyoza ; nunka me grita, a la kontra, me arregala… Rodolphe, su marido, parese mas severo, ma tyene un korason de oro i una boz de tenor. Kanta pedasos de opera o de opereta por mi mas grande plazer.
So tambyen trokado de eskola, i metido en la misma eskola ke mi primika, el kurso Chanez, una eskola privada un poko manko sekanoza i ande el ambyente es muncho mijor ke ande mi negrinyada de maestra. Es en esta eskola, penso, ke tuve de empesar la primera klasa en oktovre 1942. En esta eskola, no es leche ke se esparte, o si es no me akodro, ma « bonbones » vitaminados. Chikos hapes pembis a la savor de medikamentos, una angusya, ke portanto, por razones ke no se entyenden, agradan muncho a Maryse. A kada vez le do a eskondidas mi hap, i por esto eya chupa dos i yo dinguno. Deve ser por esto ke me kedi chiko, i ke sovre las fotos de este tyempo es mas alta de mi de una buena kavesa…
Todo seriya por lo mijor si no aviya una kashkarika : mi espanto de los lovos a dezaparesido, por siguro, ma para ser remplasado por un otro, es vedra mas impresizo i manko fuerte : los sedimes. Son mis amigitas de klasa ke me disheron, a kada vez ke se aze oir en la eskola un bruido indeterminado, ke son los sedimes. No me da tanto sar komo los lovos, ama yene… ay razon de ser espantado.
A parte de este sar, bivo momentos muy agradavles. Sovre el kamino de la eskola, mi primika i yo pasamos sovre un puente arriva de un kamino de tren, i muestro plazer es de asperar ke pase un tren para toparmos enburujados por la vapor de la lokomotiva, komo en una nuve…
Otro rekodro : vimos en el boske de Vincennes kriaturas ke djugavan de korrer dos en djuntos, kada una kon un pye atado al pye de la otra, lo ke las ovligava de korrer en djuntos de un mismo movimyento. Esto mos agrado muncho, i el diya despues, para ir a la eskola, korremos ansina mi primika i yo, atados por un pye el uno a la otra.
A kontinuar…
Edmond Cohen
Paris, Fransya
Fuente: LK/eSefarad
