eSefarad Noticias del Mundo Sefaradi
Ver todos los artikolos de esta seksion
Saludes a todos
Edmond Cohen
Paris – Fransya
______________________________________________________________
26 Willy en Ashkale
Kuryozamente, kuando, salvo el kavzo trajiko de David i Flor, la famiya, en jeneral, pasa en Fransya okupada a traves de los esfuersos para matarla, i se eskabuye de los aferramyentos, es en Estambol, el lugar en prinsipyo el mas kyeto syendo ke se topa en pais neutro al abrigo de la pkupasyon almana, ke mi papu Willy Braun se va topar aferrado i internado en un kampo…
Es el triste echo del varlik vergisi, el vergi sovre el kavdal ke aharva sovre todo las minoridades non muzulmanas de Turkiya. El 11 de novyembre 1942, la Turkiya sale la ley del vergi sovre el kavdal, ke divide los pagadores en kuatro kategoriyas, una de eyas, la mas aharvada por el vergi, syendo la povlasyon turka non muzulmana : ermenis, gregos i djudyos. Asigun los kalkulos ke topi sovre internet (sovre un sityo ermeni del VAN : vijilansa anti negasyonismo) los ermenis fueron aharvados sovre la bazis de 232%, los djudyos de 179%, los gregos de 156%, los muzulmanos de manko de 5%.Un mes maksimum es dado para pagar el vergi en su totalidad. Komo, por siguro, mi papu no es kapache de pagar un vergi muy superyor a todo lo ke tyene, todos sus byenes son aferrados i vendidos, dunke no tyene mas nada, ma komo esto no abasta, es aferrado i embiyado en el kampo de prezon i de lavores forsados de Ashkale (kon 1.442 otros) entre Erzurum i la frontera ermeniya, lo ke kyere dizir de la URSS en estos tyempos, ande los friyos son komo en Siberia en invyerno i las kalores komo en infyerno en enverano. Los prezoneros son forsados de fraguar kaminos i kitar la inyeve. 32 dezmazalados deshan la vida aya. Willy konosyo peor, sovre todo en la Rusiya de la gerra sivil, i eskapa por ser liberado. Abolta en Estambol ande se aze kavedji.
A kontinuar…
Edmond Cohen
Paris, Fransya
Fuente: LK/eSefarad
